NIPADALA og suwat si Lapu-Lapu City Congresswoman Paz Radaza sa buhatan ni Department of Interior and Local Government (DILG) Seceretary Eduardo Año.
Kini aron pagklaro usab sa iyang habig sa iyang baroganan mahitungod sa isyu nga naglibot sa iyang kasamtangang pag opisina sa city hall nga hugot nga gisupak ni Lapu-Lapu City Mayor Junard “Ahong” Chan.
Si Año una nang namahayag sa mga tigbalita sa miaging semana atol sa iyang pagbisita sa Sugbo nga walay katungod si Radaza nga mag opisina sa iyang kasamtangang buhatan sa city hall.
Matod ni Radaza, sa iyang suwat ngadto ni Año, nga ang iyang buhatan nga maoy nagsilbing district office sa kongresista diha na sa iyang kasamtangang nahimutangan dihang natukod sa Lapu-Lapu niadtong 2010.
Nagpakita lang kini nga epektibo ang naasoyng buhatan sanglit mahulog kini nga usa ka one stop shop sa mga adunay transaksiyon gumikan sa kaduol niini sa ubang ahensya sa gobyerno nga naa ra usab sa cityhall.
Gibutyag ni Radaza nga dakong kalapasan sa ordinansa sa dakbayan nga nag-awhag sa mayor sa paghatag ug opisina sa kongresista ang gibuhat nga suway nga paglungkab sa mga staff ni Chan sa ilang buhatan niadtong Hulyo 1.
Ang naasoyng ordinansa sumala ni Radaza wa ma-repeal o wala madeklara nga dili balido.
“With the mention city ordinance it is the Honorable Mayor’s obligation to provide an office space for our District Office at the City Hall, in accordance to Section 455, paragraph (b) sub-paragraph (1) item (ix) of the Local Government Code, which provides for his duty to provide office space to those who by law or ordinance , are entitled to such space in the city hall,” tipik sa suwat ni Radaza.Nunot niini nangayo karon ug katin-awan ang kongresista sa buhatan ni Año unsa ang ilang baroganan kalabot sa isyu.
Mipasabot si Radaza nga makatabang gayud ug dako ang katin-awan unya sa buhatan ni Año sa ilang mga lakang nga buhaton kalabot sa naasoyng hisgotanan.
“We assure you that until receipt of your reply we will maintain status quo and will not take any action that would preempt or prejudice whatever your reply would be,” tipik sa suwat ni Radaza kang Año.
Si Chan nipakagamay lang sa suwat ni Radaza kang Año sanglit iya na usab, matod pa, gikonsulta sa secretary sa DILG ang naasoyng isyu atol sa ilang orientation sa mga bag-ong mayor sa kaulohan niadtong miaging semana.
Ug gisultian siya nga aduna siyay katungod nga mopapahawa ni Radaza sa city hall.
Naghuwat na lang usab siya sa legal opinion niini kalabot sa naasoyng isyu ug sa higayon nga iya kining madawat, iya kini nga ipatuman. (GCM)