UNSAY nahitabo sa Priority Development Assistance Fund (PDAF) ni kanhi deputy speaker Pablo Garcia?
Nganong P8.3 milyones na lang ang nahabilin gikan sa P70 milyones nga maoy balanse dihang natapos ang ikatulo ug katapusang termino ni Gobernador Gwendolyn Garcia niadtong 2013?
Kini ang pipila sa mga pangutana ni Gob. Garcia nga gusto niya matubag sa tigom uban sa mga opisyal sa Commission on Audit (COA), mga department head ug mga abogado sa Kapitolyo karong Huwebes, Hulyo 18.
Gusto usab mahibaw-an sa gobernador kon nganong gitugot ang disbursements sa maong mga pundo sukwahi sa mga katuyoan nga gitagan-an niini.
Ang P8.3 milyones nga nahabilin sa PDAF sa kanhi deputy speaker kay kabahin sa P40.7 milyones nga balanse sa PDAF nga wala na magamit sa kagamhanan sa lalawigan sa Sugbo nga gusto sa COA ibalik ngadto sa Nasudnong Panudlanan aron magamit sa mas mahinungdanon ug dinalian nga mga proyekto sa nasudnong kagamhanan.
Matod sa gobernador, gusto niya nga matuki kini sa ilang tigom uban sa mga state auditor labi na kon kini nga mga pundo kay covered ba sa Special Allotment Release Order (Saro) o sa Notice of Cash Allotment (NCA).
“We want to discusss this further because the Supreme Court decision declaring PDAF funds as unconstitutional is prospective, dili retroactive. That Supreme Court decision was handed down 2013 na.” (SCG)