UNOM ka mga kawani ug laing duha ka fixer sa Land Transportation Office (LTO) sa Cebu City Licensing Center ang nasikop sa National Bureau of Investigation (NBI) niadtong Biyernes, Hulyo 12, human sa ka unom ka buwan nga pagpaniid kanila.
Ang LTO district Office sa J Centre Mall sa Mandaue City mao unta ang target sa operasyon tungod sa giingong paghitak sa mga fixer nga dunay kakunsabo sa LTO office.
Nakugang na lang mismo ang taga LTO nga sa ilang gipasigarbo nga licensing office sa Cebu City nahitabo ang binoang.
Nagtingkagol sa NBI detention cell ug nag-atubang og mga kasong kalapasan sa Anti-Graft and Corrupt Practices Act ug Anti-Red Tape Law ang mga dinakpang kawani sa LTO nga sila si Marilyn Erederos, Jonathan Magudato, Epifanio Callino Jr., ug Charish Mae Cabigon.
Silang upat nag-ranggo og Administrative Aide VI.
Laing gisikop mao sila si Gladys Mendero ug Dembert Dasig.
Samtang ang mga nasikop nga fixer mao silang Fredlyn de Lara ug Dexter Capendit.
Matod sa agent-on-case, Wenceslao Galindez Jr., sa ilang operasyon nakuha nila ang pipila ka marked money ngadto na sa cashier sa LTO.
Kini ang gibayad sa duha ka mga nagpaka-aron ingnon nga aplikante nga gigamit sa NBI sa ilang operasyon.
Gituohan nga bahin-bahinon sa mga fixer ug sa mga nalambigit nga empleyado ang kwarta nga ilang makuha gikan sa aplikante og driver’s license nga pangayu-an nila og di momenus P7,500.
Sa maong kantidad, sigurado na nga malutsan og lisensiya nga dili na moagi sa saktong proseso.
Mao kini ang ilang modus, matod ni Galindez: Ang fixer moduol sa aplikante og driver’s license. I-forward kini siya sa laing fixer nga maoy mokontak sa empleyado sa LTO.
Matod ni Galindez, ang P7,500 cash adunay marka ug didto na kini nila na-recover sa LTO cashier.
Gatuo si Galindez nga bahin-bahinon ang bayad sa mga fixers ug ang anaa sulod sa LTO.
Si LTO Executive Director Romeo Vera Cruz ug si LTO 7 Regional Director Victor Caindec maoy nagpatabang sa NBI aron masakpan kining maong binoang.
Kini human usab makadawat og taho nga hilabihan ang paghitak sa mga fixer sa LTO labi na sa distict office nga nahimutang sa J Centre Mall sa Mandaue City.
Sigun ni NBI 7 Assistant Regional Director Dominador Cimafranca, sa operasyon niadtong Biyernes, Hulyo 12, sa J Centre unang ni-transact ang poseur applicant apan gi-refer sila ngadto sa SM Seaside, diin nakumpleto ang transaksiyon.
“Mao ning ni-take sila og action ani tungod kay rampant kaayo,” matod ni Cimafranca.
Ang mga dinakpan gibisita ni LTO legal officer Vicente Gador Jr.
Matod niya, dili magduha-duha pagduso sa kasong administratiba batok sa mga nalambigit nga kawani ang ilang ahensiya.
Gihulagway niya ang Cebu City Licensing Office sa SM Seaside nga maoy labing gipasigarbo nila nga buhatan ug wala siya magtuo nga dinhi mahitabo ag grabeng binoang.
Si Caindec, ang pangu sa LTO 7, nagkanayon nga bisan pa man og negatibo kini nga pagtan-aw sa publiko apan gikinahanglan kini nga aksyon alang sa pag-usab sa imahe sa LTO nga mawagtang ang ilegal nga mga pamaagi sulod sa LTO.
Kining mga reklamo sa “New License Fixing” sa social media mao ang rason nga nadakpan kining unom ka mga empleyado sa Licensing Center sa SM Seaside ug laing duha ka fixer.