Todino: Libreng text messaging service

HIMOONG usa ka sentimos nalang ang bayad sa matag text message. Pagkakaron, tag peso pa.

Sa miaging semana, giduso na ni Senador Imee Marcos ang iyang resolusiyon nga nag-awhag sa gobiyerno magbutang sila og price ceiling alang sa text messaging services.

Sulod sa dugayng panahon, napugos ang publiko pagtuman kon unsa may presyo nga gusto sa mga communication provider.

Way dag-anan ang mga tawo kay gikinahanglan man pud nila ang paggamit sa text message.

Apan, basi sa pagtuon ni Senador Marcos “mahal ug sobra” ra kaayo ang singil nga peso sa matag 160-ka mga character sa text message.

Matod ni Marcos kon itandi ang presyo sa text message diha sa presyo sa matag byte data alang sa data service niining duha ka higanting kompaniya, moabot lang og mas ubos pa sa singko sentabos matag megabyte sa data.

Bisan pa kon singko sentabos, makaginansiya gihapon kining mga text message provider sa nasod.

Bentaha kini sa kadaghanan, kon maaksiyonan sa gobiyerno. Ug walay katarungan nga yak-an ug dili panumbalingon kining awhag ni Senador Marcos.

Na-timing usab kini awhag ni Senador Marcos sa pagsulod sa Mislatel Consortium, kining communication provider basi sa China.

Kon mahinayon ang operasiyon sa Mislatel, unya naplastar na kining pagregulate sa bag-ong singil sa text messaging, nan, mapugos gyud kining duha ka higanting provider sa nasod pagtuman.

Pero, magpaabot ta nga mosupak gyud kining text messaging service provider. Ug ilang ikatarungan mao nga maalkansi na sila sa ilang negosyo.

Panahon na pud tingali nga mahatagan na gyud og insaktong serbisyo ang katawhan nunot sa insaktong presyo sa paggamit og text messaging services. Awhagon nato kining mga non-government organization, mga non-profit organization ug caused-oriented group nga suportahan ug ikampaniya nila kining panawagan ni Senador Marcos.

Kon posibli sa ubang nasod nga libre ang text messaging service way katarungan nga dili posibli dinhi sa atong nasod.

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph