HUMAN naangkon ang laing award sa Cagayan de Oro City Disaster Risk Reduction and Management Office (CDRRMO) sa regional level, nominado usab kini sa national nga level.
Ikatulong higayon nga nasakmit sa siyudad sa Cagayan de Oro ang award isip Best Local Government Emergency Management sa Regional Risk Reduction and Management Council ug Department of National Defense atol sa ika 21st Gawad Kalasag Award.
"We're happy to maintain and to sustain kana nga kalidad nga serbisyo and we're happy also nga na recognize ta kay usa kini nga maghatag og dakong moral ug motivation sa atong mga sakop sa atong personahe dinhi nga naghago ug nagsakripisyo pud sa ilang tagsatagsa ka mga oras," matud ni Nick Jabagat, tsirman sa CDRRMO.
Dako nilang kalipay nga nakita sa katawhan ug sa rehiyonal nga buhatan nga naningkamot sila sa paghatag og unsay kaayohan sa siyudad.
Dako usab nga hagit alang kanila ilabi na nga nominado kini sa national level.
"So na inform ta nga usa ta sa na nominate sa national level. Kini atong gi-ampo. Di man ta pero dako pud ni nga dungog usa pud ni nga hagit sa amoa unsaon pag sustain, unsaon pag improve ang atong mga serbisyo dinhi sa Cagayan de Oro City in terms of emergency," dugang niini.
Gidugang pa nga daghan ang gibasehan niini sama na lamang sa oras sa pagresponde, unsa ka hapsay ang pagresponde ug kapasidad ug uban pa.
Nasayran nga lakip usab ang City Hospital ilabi na ang J.R Borja General Hospital nga nakasakmit og award atol sa maong kalihokan.