TULO ka mga tawo nangaangol tungod sa gituohang pag-ulbo sa butane sud sa usa ka balay nga gigamit nga refilling station sa butane sa Barangay Dumlog, Siyudad sa Talisay, Martes pasado alas 12 sa tungang gabii, Hulyo 16.
Ang mga nadala sa tambalanan kinsa nakaangkon og second degree burns giila nga sila si Jimbo Gutang, 22; Mark Parba, 19; ug Jeven Daño, 21.
Ang kabomberuhan sa Siyudad sa Talisay, pinanguluhan sa ilang fire marshal, Fire Senior Inspector Arra Alpajaro, ningresponde sa hitabo sa Block 5, lot 11, Deca Homes sa Barangay Dumlog, tungod sa ilang nadawat nga tawag sa telepuno nga dunay pag-ulbo ug kalit nga pagkayo.
Apan sa paghiabot sa kabomberuhan, pawong na ang kayo ug wala na ang mga biktima kay daling nadala sa Talisay City District Hospital.
Ilang naabtan ang nagpasad na nga mga butane canister ug pito ka 50 kilogram nga Liquified Petroleum Gas (LPG) sud sa usa ka residential house nga gipanag-iya sa usa ka nagngalan og Clifford.
Sa pakisusi sa kabomberuhan, nasuta nga ang explosion niresulta sa pagkaangol sa tulo ka mga lalake tungod sa ilang posibleng pag-refill sa mga butane.
“Butane is dili gyud siya makit-an nga air. So, inig-ignite sa switch, pag-press mo ng switch, naay gamay nga spark. So, that gamay nga spark could trigger initial fire or explosion. Amo pa gitan-aw kon nag-smoke ba sila, wala pa gyud under investigation pa gyud,” saysay ni Alpajaro sa Superbalita Cebu.
Matod niya gitago og maayo sa operator ang ilang gibuhat sa sud sa balay.
“We cannot see na refilling siya from the outside kay sa adlaw daw, ingon tong mga security guards, may taklob ang balay. Dili ka kakita kon unsa naa sa sulod. Ug ang kanilang truck nga ginagamit for transport, naa gyud cover. Dili gyud siya makit-an nga butane gyud siya,” dugang sa fire marshal.
Dali usab nga nakig-alayon ang Talisay City Fire sa Talisay City Police Station.
Ang mga pulis na ang nikompiskar sa mga butane ug LPG kay sa balaud, ilegal kini.
Pabilin pa nga gisuta ang tinuoray nga tag-iya sa panimay ug sa refilling station.
Subli nga gipahimangnoan ni Alpajaro ang publiko nga gidili ang butane ug labi nang gidili ang pag-refill niini.