PAGKABUGTO sa mooring line sa MV MIKA MARI-VI maoy hinungdan nga nahulog sa pantalan ang usa ka truck nga nagkarga og sinakong bugas nga mais niadtong Lunes, Hulyo 15, sa pantalan sa dakbayan sa Danao.
Ang mooring line maoy nagsilbing higot sa barko ngadto sa pantalan.
Nahitabo kini niadtong Lunes, Hulyo 15, sa hapon diin mobiyahi unta paingon sa Consuelo sa isla sa Camotes ang maong barko. Apan tungod sa hitabo wala kini tugoti sa Coast Guard-Danao.
Paingon na unta nga isakay ang truck sa barko nga may kargang sinakong bugas mais o corn grits. Apan sa wala damha, ni-ariya lang og kalit ang atubangan nga bahin niini nga maoy giagi-an sa truck.
Wala hinuon mahulog sa dagat ang tanang sako ug na-recover pa ang uban niini.
Luwas usab ang driver ug crew nga daling nakaambak atol sa insidente.
Ang maong barko nga aduna’y sakay nga 94 ka pasahero ug 10 ka rolling cargos wala palargaha apan gipabalhin ang mga sakay niini ngadto sa laing barko sa Jomalia Shipping nga “Island RORO 1” aron mahatod sas isla sa Camotes.
Matod sa tigpamaba sa Coast Guard Central Visayas Lieutenant Junior Grade Michael John Encina nga padayon pa ang imbestigasyon sa Coast Guard-Danao aron pagtino kon kinsa ang sad-an sa hitabo.
Posibling ang kabug-aton sa maong truck mao ang usa sa nakatampo sa pagkaputol sa mooring line niini.
Giabisohan na ang kapitan sa barko nga si Romeo Pepito nga mo file og marine protest sa Maritime Industry Authority.
Nitabang usab ang Jomalia Shipping nga tag-iya sa maong barko sa pag-retrieve sa maong truck.