SECTIONS
Sunday, August 25, 2019
SUPERBALITA CEBU

Diputado: Sulbad na!

Cuentas claras

SA KATAPUSAN, nasulbad na gyod ang gumonhap nga naglimin sa hunahuna sa mga katawhan kon kinsa gyod ang ipuli kang Agriculture Secretary Manny Pinol.

Kon mahinumduman, dunay tulo ka mga pangalan ang gusto ni Pinol nga maoy mohulip kaniya isip kalihim sa DA sud sa 30 ka adlaw isip “transition period.”

Sila mao si USec Ariel Cayanan, USec Francisco Villano Jr. ug si USec Waldo Carpio.

Dili pa lang dugay, nadawat nato ang kopya sa Special Order (SO) nga nagtudlo kang USec Waldo Carpio isip OIC-Secretary sa DA gikan sa Hulyo 23 ngadto sa Hulyo 29, 2019.

Si Pinol ang mipirma sa maong SO.

Dili na lang nato hasolon pa ang atong mga hunahuna kon ngano nga si USec Waldo Carpio ang gitudlo ni Pinol isip OIC Secretary.

Si Pinol ra ang nasayod sa hinungdan.

Apan mao kini ang nakahatag ug dakong kalamdag sa panghuna-huna sa mga empleyado sa DA sanglit daghang mga pangalan ang mitumaw nga maoy mohulip kaniya.

Sa maong mga pangalan, usa ray diha sa hunahuna sa mga taga DA.

Kon taga-gawas ang itudlo, hayan magdala gyod kini og kaugalingon nga gupo nga motabang kaniya sa pagdumala sa DA.

Buot ipasabot, dunay pipila ka mga opisyales sa DA nga mawad-an ug trabaho o kaha, ibalhin sa laing posisyon.

Karon kay si USec Waldo Carpio taga-sulod ra man, nakaginhawa og luag ang mga opisyales kay buot ipasabot, gamay ra ang tsansa nga mataktak ang kadaghanan kanila.

Nagpasabot ba kini nga panahon sa SONA sa Presidente karong Hulyo 22, 2019, si Carpio na ang molingkod isip tinugyanan sa Department of Agriculture sulod sa House of Representatives?

Posible nga mahitabo kini.

Ngano man?

Sumala pa sa kasaligan nga tinubdan, molarga si Pinol padung sa Amerika aron pagsaksi sa kombati sa ring ni pambansang kamao Manny Pacquiao batok kang Thurman.

Kon mahitabo nga mahitukma sa SONA sa Presidente ang paglarga ni Pinol, klaro kaayo nga duna gyoy laing tawo nga mohulip kaniya sa maong okasyon.

Usa sa mga labad sa ulo nga problema sa DA mao ang budget niini.

Imbis modako, migamay na hinuon ang budget sa DA nga unta, importante man ang isyo sa pagkaon sa nasod.

Nagakagamay, matod pa.

Unsaon man pagsulbad ang problema sa kakulang sa pagkaon sa nasod kon mogamay ang budget sa DA unya magsalig na lang ang gobierno sa pagkaon nga gipalit gikan sa laing mga nasod?

Nindot nga sulbaron ang kakulangon sa pagkaon pinaagi sa pagdugang sa pondo nga gamiton sa DA.

Ang paglingkod karon ni USec Waldo Carpio isip hulip kang Pinol gituhoan nga dako og ikatabang sa pagsulbad sa problema sa pondo sa DA.

Ngano man?

Si USec Waldo Carpio manghod ni Atty. Mans Carpio nga maoy bana ni Davao City Mayor Sara Duterte Carpio.


VIEW COMMENTS
DISCLAIMER:

SunStar website welcomes friendly debate, but comments posted on this site do not necessarily reflect the views of the SunStar management and its affiliates. SunStar reserves the right to delete, reproduce or modify comments posted here without notice. Posts that are inappropriate will automatically be deleted.


Forum rules:

Do not use obscenity. Some words have been banned. Stick to the topic. Do not veer away from the discussion. Be coherent. Do not shout or use CAPITAL LETTERS!

sunstar.com.ph