BISAN wala siya pormal nga gipahibalo sa Los Angeles Lakers nga ibalhin siya sa New Orleans Pelicans, gitataw ni Lonzo Ball nga wala siya’y kaligutgot bisan gamay.
Si Ball, kinsa gikuha sa Lakers isip No.2 overall pick niadtong 2017, nahilakip sa mga magduduwa nga gibuhian aron makuha si All-Star Anthony Davis gikan sa Pelicans.
Nagkanayon si Ball nga nasayran lang niya nga nabalhin na siya sa Pelicans pinaagi lang sa Twitter.
Gipasabot ni Ball nga wala siya nasurpresa ug nipatigbabaw ang iyang kahinam nga moduwa sa bag-ong team.
“I was kind of excited, honestly. I kind of figured someone was going to get moved soon enough. I knew Anthony Davis wanted to come bad,” matod ni Ball.
“Anytime you can get a guy like that, you are going to have to do what you have to do to get him. So I was kind of already just waiting for it, honestly, and I was happy to go with two guys I am comfortable with in B.I. (Brandon Ingram) and J-Hart (Josh Hart). I am excited to see what we can do.”
Giangkon ni Ball nga ganahan unta siyang moduwa sa Lakers hangtod sa iyang pagretiro gumikan kay nagpuyo sa Los Angeles ang iyang pamilya apan nakasabot ra siya sa desisyon sa Lakers. Ang 21 anyos nga magduduwa nag-average og 9.9 puntos, 5.3 rebounds ug 5.4 assists sulod sa 47 ka mga duwa.
Sa pikas bahin, mipirma og $170 million five-year extension contract sa Philadelphia 76ers si Ben Simmons.
Kini gikumpirma sa agent sa Sixers point guard nga si Rich Paul.
May average nga 16.9 points, 8.8 rebounds, 7.7 assists ug 1.4 steals ang 23-anyos nga magduduwa.
Nahimo siyang kabahin sa All-Star team niadtong 2018-2019 season.
Nakuha sab niya ang No.1 overall pick niadtong 2016 NBA Draft ug midaug ang 6-foot-10 Australian native sa NBA Rookie of the Year honors niadtong 2017-2018.