NAGPASALAMAT ako sa tagdumala sa University of Mindanao nga kanunay kami ipadala sa mga training workshops aron madugangan among kahibalo sa paghimo sa among tahas.
Ang labing ulahi namo nga gitambongan kagahapon mao ang Dagyaw: Open Government and Participatory Governance Regional Town Hall Meeting and OGP Workshop didto sa Davao Recreation Center (kanhi Almendras gym).
Ang maong kalihukan giorganisa sa Department of Finance (DOF) ug Department of Interior and Local Government (DILG) ug uban sa suporta sa Presidential Communications Operations Office (PCOO) nga gitambongan sa non-government partners.
Ang Dagyaw usa kini ka Hiligaynon nga termino nga nagpasabot nga pagtinabangay. Nahinumdom ko niini nga pulong sa elementary grade pa ko didto sa Bukidnon diin magtinabangay among mga silingan ug akong ginikanan pagpamugas sa ilang umahan. Magpulihanay sila pagpugas sa luna sa among mga silingan.
Sa konteksto sa maayong panggobyerno, magtinabangay ang ahensiya sa gobyerno ug mga katawhan sa pagkab-ot sa kalambuan.
Gipasabot sa mga mamumulong sa nahisgutan nga mga ahensiya ang tinguha ni Pangulong Rodrigo Duterte nga ipaduol ang gobyerno sa katawhan.
Kini aron mosalig ang katawhan ug motabang kini sa pagpalambo sa nasud.
Aron hingpit kini nga matuman, dunay mga dayalogo nga gihimo ang gobyerno sa nagkadaiyang dapit sa nasud.
Sa maong tigum kagahapon, gitubag sa mga ahensiya ang pangutana sa mga partisipante gikan sa lokal nga panggobyerno, pagsumpo sa insurhensiya, isyu sa buluhisan, kapobrehon, ug daghan pa.
Epektibo kini nga paagi, apan mas nindot nga dalhon kini nga dayalogo sa kabarangayan aron seguro nga maabot gyud sa katawhan ang impormasyon.
Di man god kita makaseguro kung ipaambit gyud sa mga partisipante ang ilang nasayran ngadto ilang komunidad.
Apan, sa among bahin nga gipadala kagahapon sama nila Professor Bonnie Hamilton Rabaca, Professor Adonis Rañon, ug mga estudyante nga sila Viness Acosto, Jescah Joy Alamansa, ug Nervo Tajan nga nagtungha sa BA Political Science, seguro ako nga ila kining ipaambit sa uban.
Sa kinatibuk-an, nakadayeg ako sa maong programa diin daghan ako og napupo nga impormasyon nga ikapaambit sa katawhan.