Davao mayor nihimakak nangilabot sa EMB-DENR

GIHIMAKAK ni Davao City Mayor Sara Duterte-Carpio ang pagkalambigit sa bisan unsang transaksiyon sa Environmental Management Bureau (EMB) sa Department of Environment and Natural Resources (DENR).

Sa iyang opisyal nga pamahayag nga gipagawas niadtong Lunes, Hulyo 15, gisulti ni Duterte-Carpio nga ang iyang buhatan nakadawat og mga taho nga si EMB-Davao officer-in-charge (OIC) Wilson Trajeco wala misunod sa gitugot nga sumbanan ug regulasyon base sa paggamit sa iyang pangan sa usa ka transaksiyon.

“The public is informed that Mayor Duterte does not personally know Mr. Trajeco,” sumala sa mayor.

Giklaro sab niya nga wala siya manghilabot ug di gyud manghilabot sa trabaho sa EMB.

Gisulti ni Duterte-Carpio nga ang lokal nga kagamhanan sa siyudad di motugot og laktod sa iyang “regulatory and documentation” nga mga proseso pabor sa bisan kinsa ug kini nga respeto sa balaod apil ngadto sa mga buhatan gawas sa lokal nga kagamhanan.

“As a policy, the Office of the City Mayor and Mayor Duterte do not call or talk to other officials about transactions,” puno pa niya.

“If there is a need for communication, there will always be a note on the official letterhead with security features sent to concerned offices,” dugang pagklaro niya.

Wala hinuon gibungat sa mayor ang mga higayon nga gigamit ni Trajeco ang iyang ngalan sa transaksiyon.

Gisulayan sa SunStar Davao ang pagkuha og bahin gikan sa DENR ug EMB pinaagi sa pagtawag sa telepono ug text interview, apan hangtud sa pagsuwat ning balita, wala pa sila mipagawas og tubag.

Gisulayan sab sa SunStar ang pagkuha sa bahin ni Trajeco sa iyang personal Facebook account, apan wala pa sab siya nitubag hangtud sa pagsuwat. (Ralph Lawrence G. Llemit)