GIBUTYAG sa Department of Health (DOH) nga ang Davao Region apil sa mga rehiyon nga gi-monitor human milapas ang ihap sa mga kaso sa dengue (alert threshold), nga madebelop ngadto sa epidemya.
Sa pamahayag niadtong Lunes, Hulyo 15, si Health Secretary Francisco Duque III nagdeklara og National Dengue Alert tungod sa kalit nga pagsulbong sa ihap sa mosquito-borne disease nga namatikdan sa daghang mga rehiyon nga nikalas na og daghang kinabuhi.
Gawas sa Davao Region, ang Ilocos Region, Cagayan Valley, Calabarzon, Bicol, Eastern Visayas, Zamboanga Peninsula, Bangsamoro Autonomous in Muslim Mindanao (BARMM), ug Cordillera Administrative Region apil sab sa mga gi-monitor sa posibleng “outbreak”.
Apil sa mga rehiyon nga nilapas sa epidemic threshold o kritikal nga ihap sa mga kaso nga gikinahanglan alang sa epidemya aron nga ideklara mao ang mga rehiyon sa Mimaropa (Region 4-B), Western Visayas (6), ug Northern Mindanao (Region 10).
Matud ni Duque nga ang clustering sa mga kaso kinahanglan nga ilhon sa DOH regional office isip basehan alang sa pagdeklara og localized epidemic sa barangay level.
Gipalihok na ang code blue alert sa National Disaster Risk Reduction Management Council (NDRRMC) pinaagi ni Undersecretary Ricardo Jalad sa Office of Civil Defense (OCD). Iyang gipahibawo nga DOH, isip nanguna nga ahensiya makigkumboya sa NDRRMC Health cluster.
Gi-esplikar sa opisyal sa panglawas nga ang kaso sa dengue naobserbahan nga motaas matag tulo ngadto sa upat ka tuig ug dugang nagpahimangno sa publiko nga ang “early detection and proper case management” makalikay sa kamatayon. Tuig 2016 sa dihang namatikdan ang pagsulbong sa mga kaso sa dengue, hinungdan nga karong 2019, gilauman nila nga kalit nga pagtaas sa mga kaso sa dengue.
Base sa ilang datos gikan Enero 1 hangtud Hunyo 29 karong tuiga, dunay kinatibuk-ang 106,630 kaso sa dengue nga ilang natala samtang dunay 57,564 gitahong mga kaso niadtong 2018 sa samang panahon, mga 85 porsiyento mas taas itandi sa datos sa milabay nga tuig.
Sumala sa DOH nga ang dengue usa ka viral disease nga wa pay naila nga bakuna o specific antibiotics. Ang epektibong pagpaniid makatabang sab sa pagpakubos sa mga kaso ug kamatayon kon ang mga lugar nga na-cluster sa mga kaso maila og sayo.
Mga sinyales ug simtomas sa sakit mao ang taas nga hilanat, panakit sa luyo sa mata, pagpanakit sa mga kaso-kasohan ug kaunoran, kakapoy, lipong, pagsuka-suka, ug mga skin rashes.
Taliwala sa pagsulbong sa mga kaso sa dengue, si Duque nagsulti nga ang mas epektibo nga paagi sa pagpakgang sa dungue mao gihapon ang 4S strategy - “Search and destroy mosquito breeding places, Self-protective like wearing long sleeves and use of insect repellent, Seek early consultation on the first signs and symptoms of the disease, and Say yes to fogging if there is an impending outbreak.”
“Dengue is preventable through the 4G strategy and early detection. Do the 4S and know its signs and symptoms,” butyag ni Duque.
Sayo niini, ang kagamhanan sa Island Garden City of Samal (Igacos) nagdeklara og state of calamity tungod sa dengue fever outbreak. Base sa taho sa Igacos CHO-Epidemiology and Surveillance Unit, dunay 249 mga kaso sa dengue nga natala gikan Enero hangtud Hunyo karong tuiga.
Ang rehiyonal nga buhatan sa DOH-Davao wala pa makapagawas og datos sa mga kaso sa dengue karong adlawa, Hulyo 17, atol sa press briefing sa ilang conference room sa J.P. Laurel, Davao City. Juliet C. Revita