Pamilya nalubong sa landslide

DAVAO. Gisusi sa lokal nga kagamhanan sa Jose Abad Santos, Davao Occidental, pinangunahan mismo ni Mayor John Jason Joyce, ang lugar kon diin nahitabo ang landslide niadtong Dominggo. (Facebook post ni Mayor John Jason Joyce)
DAVAO. Gisusi sa lokal nga kagamhanan sa Jose Abad Santos, Davao Occidental, pinangunahan mismo ni Mayor John Jason Joyce, ang lugar kon diin nahitabo ang landslide niadtong Dominggo. (Facebook post ni Mayor John Jason Joyce)

JAS, Davao Occidental -- Nakit-an na sa mga sakop sa Municipal Disaster Risk Reduction and Management Council (MDRRMC) ang tulo ka mga sakop sa pamilyang Serna kinsa nalubong sa yuta human nagka-landslide sa Barangay Nuing, Dominggo sa gabii, Hulyo 14.

Mga biktima nailhan nga sila si Efrencio Serna Sr., asawang si Mateya, pulos 53, ug anak nga si Efrencio Jr., 23, pulos molupyo sa Purok Mangga sa lugar.

Sumala ni Mayor John Jason Joyce nga gihinabi sa SunStar Superbalita sa Facebook chat Martes, way puas ang uwan sa lugar gikan alas 8 hangtud alas 10 sa gabii niadtong Dominggo.

Naglakaw ang mga biktima kilid sa bukid, daplin sa sapa sa dihang kalit lang miligid ang usa ka dakong bato, inubanan sa mga yuta nga midahili.

Matud sa mayor nga gikan namalit og pagkaon ang mga biktima apan sa ilang pagpauli naatlan sa landslide.

Si Joyce nagbutyag nga sayo sa buntag niadtong Lunes, nakit-an nga patay na ang mga biktima hinungdan nga daling milihok ang lokal nga gobyerno aron ipahiluna ang mga nahisgutan.

Mihatag na sab ang lokal nga gobyerno og salaping mobalor sa P20,000 ug mga hollow blocks ug semento aron mahatagan og disenteng lubong ang mga biktima.

Apan, magpatabang sab sila sa kagamhanang probinsiyal aron mahatagan og ayuda ang mga nabiyaang pamilya ni Efrencio, Jr. nga duna pay 5-anyos nga anak.

“Ikinalulungkot po natin na may tatlong myembro po ng ating komyunidad sa Nuing ang binawian ng buhay dahil sa landslide. Agaran po nating pinuntahan ang area para mahanapan ng paraan ma hindi na maulit ang ganitong pangyayari. Napagkasunduan namin ng mga barangay leaders na isara ang makitid na daanan sa gilid ng bundok at gumawa ng mas ligtas na daanan sa taas ng bundok. Bukas ng umaga (kagahapon) po ay sisimulan na po natin ang paggawa ng mas ligtas na kalsada para sa mga naninirahan sa looban lalo na para sa mga estudyante,” subay sa Facebook post ni Mayor Joyce.

Samtang nagpasidaan ang mayor sa katawhan sa lugar nga mag-amping kanunay ilabi kon daut ang panahon ug mas maayong magpundo na lang sa panimalay aron malikayan ang disgrasya.

Giabisohan sab niini ang publiko nga magbinantayon sa baha ug landslide ug mas maayong mobakwit gilayon sa mga evacuation center.

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph