TUNGOD sa kahakog ug wa makontento sa ilang suweldo sa pagpanarbaho sa buhatan sa Land Transportation Office (LTO) naghimo pa gayud og ilegal.
Ang nahitabo nadakpan ang unom ka trabahante sa LTO Licensing Center sa Cebu City ug duha ka fixer sa gihimong operation sa National Bureau of Investigation (NBI) 7.
Ang way mga batasan nakigkunsabo sa mga fixers sa pagpalusot aron mas dali ang pagkuha og drivers license sa mga nag-apply pinaagi sa pagbayad og P7,500.
Mao diay daghang driver nga way kalibotan sa balaod sa trapiko ug uban adik pa kay mobayad man lang ngadto sa mga kanahang trabahante sa LTO.
Saludo ko ni LTO Region 7 Director Victor Caindec, nga maoy nagpadakop sa NBI iyang mga empleyadong kurakot nga sila si Marilyn Erederos, Jonathan Magudatu, Efipanio Callino Jr ug Charish Mae Cabigon nga naghupot ug posisyon nga administrative aide Vl .
Dugang nadakpan sila si Gladys menderò ug Dembert Dasig ug ang mga fixer nga sila si Fredlyn de Lara ug Dexter Capindit.
Away sa Lapu-Lapu
Mahog na hinuon nga bati si Kongresista Paz Radaza, sa pagpaugat sa wa pagbiya sa iyang opisina sa Lapu-Lapu City Hall.
Naa man gud ang kamandoan sa national office sa Department of Interior and Local Government (DILG) sa pagbiya sa maong buhatan.
Unang gipapahawa ni Lapu-Lapu City Mayor Ahong Chan si Kong. Radaza. Ang panagbangi sa duha sa dihang napildi ni Chan si Boy Radaza sa pagka mayor nga maoy bana ni Paz.
Kulban og kaldero
Nakadawat kog mga reklamo gikan sa mga nawad-an ug trabaho nga mga empleyado sa Kapitolyo sa Sugbo ug Cebu City Hall.
Dili lang ako ang nakadawat og reklamo naglakip na niini ang halos tanang kauban nako sa media.
Sa ingon man gud niini nga sitwasyon normal lang basta bag-o na ang gobernador ug mayor.
Apan anaa pa gihapon ang kahigayunan nga makabalik ang uban kanila. Kay sa buwan sa Agusto makabalik ang wa pa ma-renew.
Ang gobernador ug mayor tawo ra sab na sila nga mobati og kalooy. Wa sa ilang kasingkasing nga tuyo-on ang pagkulob og kaldero aron mangapasmo ang mga pobreng nagtinarong sa ilang panarbaho.
Reklamo
Sipa ang reklamo nga akong nadawat batok sa bag-ong principal sa Labangon Elementary School gikan sa mga ginikanan sa mga estudyante.
Matod pa sa mga ginikanan wa sila makauyon sa pagdili kanila sa principal nga makuha ang ilang mga anak sa lunch break aron makauban sa pagpaniudto.
Giingon nga wa maminaw kanilang mga gikinakanan ang principal sa ilang hangyo. (Email: efrenlonzon71@gmail.com / Text: 09235562777)