MGA duwa karon:
4:30 pm- San Miguel batok Meralco
7:00 pm- Magnolia batok Talk N Text
Pagpakabuhi maoy misyon sa Meralco Bolts sa ilang pagpakigbatok sa San Miguel Beermen sa premiro sa duha ka krusyal nga mga kombati sa Phillippine Basketball Association (PBA) Commissioner’s Cup sa Araneta Coliseum.
Ang Bolts kasamtangang naa sa ika-10 nga puwesto dala ang 3-7 nga rekord apan aduna pa kini poruhan nga makasulod sa quarter-finals kon ilahang mapilde ang Beermen.
Kon molampos ang Bolts ning maong tahas, hayan makapugos kini og triple-tie sa 4-7 nga rekord kauban ang Alaska Aces ug Phoenix Pulse Fuel Masters.
Ning maong senaryo, manamilit ang Fuel Masters gumikan sa ubos nga qoutient samtang magtinagakay ang Bolts ug Aces alang sa inilugay sa ikawalo ug katapusang luna sa quarter-finals.
Kon mapilde ang Bolts, hayan hingpit silang manamilit ug ang Aces ug Fuel Masters mao ang mag-ilog sa No.8.
Sa ilang bahin, ang Beermen nakaseguro na og luna sa quarter-finals dala ang 5-5 nga rekord apan nagkinahanglan gihapon silang modaog ning sangkaa aron makalikay og twice-to-beat nga kontra sa quarter-finals.
Human sa elimination round, ang top 2 teams maggunit og twice-to-beat nga bintaha batok sa No. 7 ug No.8 teams samtang ang laing duha ka mga parisan kombatihon pinaagi sa best-of-three.
Sa kasamtangan, ang Beermen naa sa ikaunom nga puwesto diin ilang gikauban ang Magnolia Ang Pambansang Manok Hotshots.
Kon modaog ang Beermen, hayan makaseguro na sila og labing ubos ikaunom nga puwesto ug puwede pa kining mosaka kon mapilde ang Magnolia batok sa league-leader Talk N’ Text Katropa (9-1) sa main game.
“For us, talagang must-win kami,” matod ni SMB coach Leo Austria sa PBA.PH. “Every game namin since three games ago, talagang treatment namin do-or-die na lahat iyan (games), eh. So far, nag-wo-work. Sana bukas din.”
Ang Pambansang Manok adunay sama og tahas sa Beermen hinungdan nga ningkuha sila og bag-ong import nga si ex-NBA player Rakeem Christmas sa tinguha makalugnot sa ulahing bahin sa standing.
Sa ilang bahin, ang KaTropa, bisan nakaseguro na sila sa No.1 nga luna, nagkinahanglan gihapong modaog aron taas ang ilang moral inig sugod sa quarter-finals. (ESL)