ADUNAY 19 ka Persons with Disabilities (PWD’s) nga nahatagan og trabaho pinaagi sa abag sa Department of Social Welfare and Development (DSWD 7) sulod lang sa unom ka buwan.
Sa kasaulogan sa 41st National Disability Prevention and Rehabilitation Week, ang DSWD 7 mipahibalo nga 19 ka buok PWD’s ang aduna nay trabaho gikan niadtong Enero hangtod Hunyo niining tuiga, “matod ni DWSD-7 Focal Person Dr. Graeme Armecin.
Ang 19 ka buok PWD’s nagtrabaho na sa nagkalain-laing mga salons ug spas, restaurants ug medical clinics sa Dakbayan sa Sugbo. Kining mga PWDs ni-agi og vocational training sa nagkadaiyang kurso nga gitanyag sa Area Vocational Rehabilitation Center II sa Camomot-Franza Road, Labangon, usa ka programang gipanguluhan sa DSWD.
Ang AVRC II usa ka establisemento diin mahatagan og igong kaalam, trabaho ug panginabuhian ang mga PWD.
Matud pa ni DILG-7, Focal Person Josie Remoreras, adunay 136 kabuok rehistrado nga PWD’s sa tibuok Rehiyon-7 ug 57 niini miyembro sa Persons with Disability Affair Office (PDAO). (Chello Barellano CNU Comm Intern)