LIMASAWA, Southern Leyte - Usa ang nakalas samtang naluwas ang 14 ka mga sakay sa pumpboat nga nalunod sa kadagatan sa utlanan sa Limasawa ug Padre Burgos sa Southern Leyte, Lunes, Hulyo 15, 2019.
Si Adelaida Palero, 65, nagpuyo ning lungsod gideklarar nga dead on arrival ni Dr. Jessa Mae Rosete.
Naluwas ang mga pasahero nga sila si Raul Oronos, 26, taga Burauen Leyte; Megan Bardillon, 26, Tacloban; Angelica Bula, 24, Tacloban; Jona Mae Budlat, 19 ug Eva Mae Budlat, 22; Rev. Fr. Arthur Duarte, 38; Haddie Seboc, 38; Heriberto Alatraca, 46; Clifford Napoles, 39; Janette Napoles, 39 ug Mary Rose Semeros, 9.
Luwas usab ang operator nga si Ruel Daling ug pahenante nga si Jerico Embodo.
Base sa report sa Limasawa Disaster Risk Reduction and Management Office, nibiyahe gikan sa Padre Burgos ang pumpboat paingon sa Limasawa.
Alas 2 pasado sa hapon, nalunod ang pumpboat gumikan sa kakusog sa hangin ug kadagko sa bawod sa kadagatan.
Matod ni Seaman 1st Kelvin Guial, Asst. Petty Officer In Charge sa Coast Guard District Eastern Visayas, way pagtugot ug way rehistro ang pumpboat nga mibiyahe.
Matod ni Guial, dunay tubagunon ang operator sa pumpboat gumikan sa pabiyahe niini nga way pananghid.
“We will wait for further instruction sa district commander namin kung anong immediate action diyan sa mga operators na umaalis ng walang paalam,” matod ni Guial.
Giklaro naman sa Coast Guard nga wa namatay si Palero gumikan sa pagkalunod, kundi tungod kini sa iyang medical issue.
Gani may panimuot pa kini sa dihang padung gidala sa baybayon sa Limasawa, apan kalit kini nga nawad-an sa panimuot pag-abot sa baybayon.
Gikan sa Maasin City si Palero kay nagpa dialysis.
Padayon naman ang pahimangno sa Coast Guard hilabi na sa mga gagmayng sakayan nga di mobiyahe kon naglain ang panahon.