DUL-AN sa 6 milyones pesos ang kantidad sa kapin sa usa ka ka kilo nga cocaine nga nasakmit sa mga operatiba sa Regional Intelligence Division (RID-7) sa Police Regional Office (PRO-7) sa sunodsunod nga mga operasyon gikan sa Bohol, dakbayan sa Sugbo ngadto na sa Samar.

Ang dose ka bultong cocaine unang nasakmit dinhi sa Sugbo.

For updates from around the country, follow Sun.Star on Twitter

Apan sa wa pa kini gipahigayon, nakuha sa unang operasyon sa RID-7 ang cocaine nga wa pa matino ang gidaghanon didto sa Bohol niadtong Sabado, matod sa usa ka tinubdan.

Human sa operasyon dinhi, laing usa ka kilo sa cocaine ang nakuha sa Borongan, Eastern Samar nga sakop na sa rehiyon 8.

Apan ang kadagkuan sa PRO-7 nagdumili pa sa paghatag og mga detalye labot sa ilang operations tungod kay karong adlawa mopahigayon og press conference si Chief Supt. Lani-o Nerez ug ang kadagkuan sa Philippine Drug Enforcement Agency (PDEA-7).

Kasayuran nga nakuha sa Sun.Star Superbalita nibutyag nga usa ka tawo ang una nang nadakpan sa RID-7 sa pantalan sa Sugbo niadtong Lunes sa udto human gipahigayon ang buy bust operation.

Nakuha sa operasyon ang 12 ka mga bulto sa cocaine diin matag usa ka bulto mokantidad og tag P60,000.

Alang sa gihimong follow-up operation, ang grupo nilarga sa Samar ug pag-abot sa dapit kagahapon sa kadlawon, ilang naabtan ang usa ka payag nga way tawo.

Didto ilang nakuha ang usa ka kilo nga cocaine nga kabahin sa una nilang nasakmit.

Gikataho nga high grade ang maong cocaine nga nakuha sa kapulisan sa rehiyon-7.

Matag kilo mokantidad kini og P5 milyunes.

Ang dinakpan kansang ngan gipugngan lang una sa Sun.Star Superbalita gikatahong taga lalawigan sa Bohol samtang ang iyang ig-agaw nga taga Samar maoy iyang kontak nga mopabaligya dinhi sa Sugbo.

“Alarming na man gud ni kay niadto pa ning Sinulog nagsugod na ang ilang pagbaligya dinhi sa Cebu,”asoy sa usa ka tinubdan nga di gustong nganlan.

Gani ang ilang kontak nga mopalit mao na ang mga bigtime drug pusher dinhi sa Sugbo.

Ang palit himuon na sa inilang mga bar sa dakbayan sa Sugbo ug usa sa mga dapit nga abutanan mao ang IT Park sa Lahug ning dakbayan.

Ang pangulo sa Philippine Drug Enforcement Agency (PDEA-8) nga nagbase sa Tacloban City nga si Director Libay Ortiz nga nahinabi sa Sun.Star Superbalita diin nasakop ang lalawigan sa Samar nibutyag nga nisiaw karon ang pagpamaligyag cocaine sa ilang area sa ubos kaayo nga kantidad.

Gani ang ilang buhatan sukad niadtong Disyembre nakasakmit nag 300 ka plastic diin matag usa moabot og tag-usa ka kilo.

Iyang gibutyag nga niadtong hinapos sa Disyembre usa ka fishing boat gituohang gikan sa nasod sa China nga nitadlas sa Pacific Ocean paingon sa laing nasod.

Ang fishing boat gituohang gigukod sa U.S. Coast Guard hinungdan nga ang ilang mga kargang cocaine gilabay sa dagat.

Samtang usa sa mga dapit nga gidagsaan sa mga illegal nga drugas mao ang lalawigan sa Samar, ilabi na ang Eastern Samar.

“Sagad sa nakapunit ani diri mga mananagat.Unya walay kalibotan unsa ug tag-pila. Ibaligya rag tag P2,000 ang usa ka plastic.

Kadtong mga marunong tag P20,000 ra.”asoy ni Ortiz.

Iyang gihulgaway nga matag cocaine gisulod sa plastic ug gilibotan pag masking tape hinungdan nga di gyod mabasa.

Nagtuo siya nga ang nasakmit sa mga operative sa PRO-7 tipik lang sa mga cocaine nga nagkatag sa ilang rehiyon ug posebling ang uban niini niabot na dinhi sa Sugbo tungod sa daghang mga mamalitay itandi sa ilang lugar.