SECTIONS
Friday, August 23, 2019
PAMPANGA

Garcia: Pasubali para king sarili (Exceptions for oneself)

Kapisik



NINU ing makamale

King salusu ning bigang lalabas

Susulapo ning anging amyam

Kaliwas ning abagat?

Balang metung mimisip

E ya malyaring dugpan ning nanu mang sigwa.

Deng mung aliwa!

Aliwa yaku.

Deng mung aliwa!

Ninung makamalit

King pirapal ning bye pangsamantala

Tataginis ning balang also

Kanglas ning balang bengi?

Balang tau e makaisip

A ya malyaring dakpan ne ning kamatayan.

Deng mung aliwa!

Aliwa yaku.

Deng mung aliwa!

Alang bisang mye pansing

King maslag a katutwan.

Pipilinan da pa ing lintwang ning pamangalingwan.

Kabud datang na ing mitakdang penandit

Ing katutwan lakwas dang e buring akit.

~ Miguel Serrano, “Deng Mung Aliwa,” Ka-19 ning Disyembri, 2006

***

Byasa tamu ngan magsisti karing kamalyan, kakulangan at kalabisan da reng aliwa. Karing pibale-bale, pipagaralan, pipagobran at king katungkulan tamu king bangsa anting metung a memalen mayayakit ing ugaling pamanakit karing mali da reng aliwa dapot ing mali tamu e ta akakit. Sabi da pin deng matwa, “Akakit me ing busbus ning karayum, dapot e me akakit ing busbus ning palakul.”

Makanyan mu naman ing pamanakit tamu king sarili tamu anting e magkamali misan man. Bala tamu pantas tamung alang kasalat-salat kamalyan. Agyang i Perfecto e ya tutung perpektu. Lagyu mu ita. Ambisna nanung palagyu kaninu man, e naman ita ing maging ugali ning makilagyu. Pasakdalan na pin, ating makilagyung Jesus--e la mu ditak—dapot nanu lang klasi pangatau? Ngara ping magsisti deng aliwa, “Nung ninu pa ing lagyung santu ya pang ugaling dyablyu.”

Magkamali tamu ngan, alang pasubali. Tau ta mu mu at tanda na nita, sisipun ta ngan, manguku ta ngan, sasakit ta ngan at ita tanda na mu ning e ta pantas o perfect. Inya sa’t e ta sukat mikaka-maling kapanwalan a itamu makayaliwa ta kareng sablang kapara tamung tau. Ita bista’t ating katutwan ing kasebyang, “Balang tuntunan ating pasubali” o king English, “In every rule there is an exception.” E ya pasakdalang katutwan ita o absolute truth.

Itamu ngan mipanganak tamu, inya sa’t siguradu ing kebuktut na katamu ning ima tamu at dela na katamu king pilunan tamu king atsan na. King ka-syam—o nung miparanun, pitung bulan—misapwak tamu king masala. Alang pasubali ita karing sablang lelangan.

Potang bingut tamu pa, kaylangan in gating maningat, magbante at lumingap kekatamu uling ala ta pang sikanan, makagyung kaisipan at makagyung malit bang e ta mamatakad karing aliwa. Pakanan da la reng bingut deng ima angga na potang dagul na la katawan at mikasikanan na la at pamisip bang malyari na lang maging malaya at e mamatakad kaninu man.

Mikakasakit balang metung kekatamu at ing pamiyaliwa mu ya pin ing nung makananu kabayat, kadalas at nung malyari ta pang mipaldan. Kabang lalabas ing panaun, balang metung kekatamu tutwang alang pasubali subali mu nung mayangu ka bye maranun.

Kabang tutwa tamu daralan tamung dakal a sigalut, lungkut at takut king siguradung malyari—ing kamatayan. Ninu ing e mate karing ninu mang mabibye o mabye? Ninu ing makapasubali? Ing marok a balita--dasan tamu ngan ing penandit at danasan tamu ngan ing kamatayan. Makanyan man, ating mayap a balita—aliwa itamu ing mate—ing katawan tamu mu ing mate at aliwa itamu o ing kaladwa. Alang pasubali ita.

***

Dake Talabaldugan:

inuyat – (palagyu) pepabukal a sabo atbu a daratuk da kareng bukung kwayan o basyung lata. English: taffy stored in bamboo joints or used cans. Alimbawa king pamangamit: “Agyang ya mung yulam nang Abling ing inuyat aptasab na na ing metung a kalderang nasi.”

ingat¹ – (palagyu) pamaningat, sese/pamanese, lingap/pamaglingap. English: care/carefulness, act of taking care of someone or something. Alimbawa king pamangamit: “Alang katumbas ing ingat a gagawan na ning bayung manulu king dara ku at angga na inyang mebina ya e ne likwan.”

ingat² – (palagyu) ingatan, babanten, antabayanan, lilingapan, sisesen. English: sme quality possessed or something taken care of for safekeeping. Alimbawa king pamangamit: “Mipaldan ya keng ingat na king bingut a masakit ning talapanese nang tau, Manibaug.”

inge – (palagyu) kaynge, aksing, kalampag, kalantug. English: noise, sound pollution. Alimbawa king pamangamit: “E makukwa king inge ning ninu man ing tanda ning kebyasnan.”

inggít – (palagyu) kainggitan, dirya/rirya; pangalalu. English: envy. Alimbawa king pamangamit: “Ing inggit manibatan king maling kapanwalan a pilan la mu ring ating karapatang ligaya.”

***

GAWING MEKALINGWAN KARING KAPAMPANGAN!

Ing “inuyat” ing mabasang bagyang minunang aske ning kukul o awsan da king aliwang manung “panotsa” o “panutsa.” Gawa iti keng sabo ning atbung mekabyo na at pepabukal bang kumunyat. Deng aliwa kakanan dang magdili-dili at ding aliwa panyangkap dang kape o aliwang mayumung pamangan o pagmayumu bukud pa keng bagkat.

King kasalungsungan—nung atin mang gagawa pa—ing inuyat malagad nang tutu ing atin pang gagawa at nung bisa ka mang sali kaylangan mu pang mantun kareng suluk-suluk da reng palengki at mekad e ka pa manakit mu naman kanita nung e ka mipalad.

***

PAMIPALINO: Ing Kapisik magnasa ya at manwalang misubling pasibayu ing lagablab ning legwan ning Kalinangan Kapampangan kapamilatan ding keyang dalit, kawatasan, amlat at miyayaliwang kapaglalangan-panyulat a misulat king pigmulan at tune kulitan kambe ning dalise at mapagmasabal a pamisip at parasan.

Ing panyulat ding pipumpunan yang sukat mataluki at miparangalan kapamilatan ning pamangamit kareti at aliwa ring karing dayu at salungat a paralan dang dela keti Kapampangan. Ing Kapisik ala yang kikilingan a kapanaligan, aguman o ninu man nung e ing Lubusang Katutwan.

Malyaring sumulat king garciakragi@yahoo.com para karing kutang o munikala.


VIEW COMMENTS
DISCLAIMER:

SunStar website welcomes friendly debate, but comments posted on this site do not necessarily reflect the views of the SunStar management and its affiliates. SunStar reserves the right to delete, reproduce or modify comments posted here without notice. Posts that are inappropriate will automatically be deleted.


Forum rules:

Do not use obscenity. Some words have been banned. Stick to the topic. Do not veer away from the discussion. Be coherent. Do not shout or use CAPITAL LETTERS!

sunstar.com.ph