HEPE sa Cebu City Police Office (CCPO) nipasalamat og dako kang Mayor Edgardo Labella tungod sa gisaad nga suporta ngadto sa kapulisan.
Siya nisaad nga iya kining suklian og maayong trabaho. Apan iyang gipahibawo nga kon di niya matagbaw ang mga Sugboanon sa iyang performance, mokanaog siya sa pwesto.
Taas ang pagtan-aw sa publiko sa kapulisan sa Siyudad sa Sugbo human kini makasakmit kapin sa P600milyunes nga balor sa sa illegal nga drugas ubos sa liderato ni retired Police Brig. General Royina Garma.
“Kung hindi ko magagawa ang aking accomplishment sa planong gusto ko, magpapaalam ako kay mayor (Labella). Baka makakuha siya ng mas magaling sa akin at ma meet ang expectation ng Cebu dito sa Cebu City Police Office,” matod ni Police Colonel Gemma Vinluan.
Tinguha pa niya nga adunay mohulip sa iyang biyaan nga pwesto nga maayo motrabaho kay sa ireklamo siya nga way nahimo sa mga krimen ug paghitak sa illegal nga drugas.
Iyang gihagit ang station commanders nga mohimog extra effort ilabi na nga dako kaayo ang suporta nga ilang nadawat sa kagamhanan sa Siyudad sa Sugbo.
Atol sa pagbisita ni Vinluan sa buhatan ni Labella, iyang giladlad ang iyang mga programa sa kapulisan sa siyudad, mga plano nga ipatuman sa mosunod nga mga adlaw.
Gisaaran usab siya sa mayor nga mohatag sa full support ang kagamhanan sa siyudad sa mga panginahanglanon sa kapulisan lakip na ang mga allowance ug gasoline allocation nga gidugangan pag mga sinakong bugas.
Tungod sa suporta nga gihatag sa mayor ngadto kanila, dakong hagit sa kapulisan ang pagtrabaho aron di mausik ang pagsalig sa mga Sugboanon.
“Kaya sabi ko sa aking kapulisan natin na that is very challenging ngayon na ang suporta ng ating butihing mayor ay sa kapulisan, wag kayong patulog-tulog. Di pwedeng patulog-tulog tayo sa pansitan,”matod ni Vinluan.
Masaligon siya sa kapulisan sa Siyudad sa Sugbo gumikan kay nahashasan na kini atol sa pamunoan ni Garma, kinsa general manager na karon sa Philippine Charity Sweepstakes Office (PCSO).
Gihulagway niya kini nga mga bulawan nga naluto na sa panahon ni Garma, apan kon gusto pa sa iyang mga sakop nga moagi pa sa kayo aron subli silang lutuon, buhaton kini niya.