SUPERBALITA CEBU

Batok illegal drugs target sa bag-ong hepe sa Lapu-Lapu

ANDAM sa hagit nga iyang sagubangon ang bag-ong director sa Lapu-Lapu City Police Office LCPO nga si Police Colonel Clarito Baja nunot niining iyang hingpit na nga paglingkod isip pangulo sa kapulisan sa dakbayan.

Si Baja pormal nang mihulip kang Police Colonel Limuel Obon sugod Lunes sa hapon Hulyo 15.

Matod ni Baja wala ra kaayo siyay kabag-ohan nga ipatuman sa kapulisan sa dakbayan sanglit nakahan-ay na kini daan gumikan kay sukad pa sa paglingkod ni Presidente Rodirigo Duterte wala gyuy paglurang ang kampanya sa kapulisan sa ginadiling drugas ug ubang matang sa kriminalidad.

Apan giangkon hinuon ni Baja nga gihatagan siya og marching order ni Lapu-Lapu City Mayor Junard “Ahong” Chan nga mas tagaan ug prayoridad ang pagbatok sa ginadiling drugas sa dapit nga giilang usa ka historic resort city.

Malaumon si Baja nga mas moubos pa unya ang crime volume sa siyudad sa iyang paglingkod uban sa panghinaot nga mahimo kining criminality free.

Base sa monitoring ni Baja wala hinuoy dako nga tigpayuhot sa ginadiling drugas o ba kaha drug group nga nag-operate sa dakbayan.

Sa pagkakaron wala pa usab siyay plano nga mangayo ug dugang personnel sa iyang ginsakopan sanglit iyang nakita nga maayo man ang kampanya nang daan sa kapulisan sa tanang matang sa kriminalidad sa dakbayan.

“Daghan man mi directives coming from the higher ups daan, labi na sa campaign against illegal drugs. So ako lang siguro e-enhance. Niawhag ko sa tanan sa katawhan sa pagtinabangay kay di man usab makaya sa pulis lang ang pagpatunhay sa kahapsay ug kalinaw, ” matod ni Baja.

Si Baja nadestino kaniadto sa Regional Learning and Doctrine Division sa Police Regional Office PRO-7 ug nahimo usab nga Provincial Director sa Siquijor Provincial Police Office.

Ang iyang pagkatudlong direktor sa LCPO maoy unang higayon sa iyang panerbisyo isip pulis human nigradwar sa Philippine National Police Academy (PNPA) niadtong 1991. (GCM)


VIEW COMMENTS
DISCLAIMER:

SunStar website welcomes friendly debate, but comments posted on this site do not necessarily reflect the views of the SunStar management and its affiliates. SunStar reserves the right to delete, reproduce or modify comments posted here without notice. Posts that are inappropriate will automatically be deleted.


Forum rules:

Do not use obscenity. Some words have been banned. Stick to the topic. Do not veer away from the discussion. Be coherent. Do not shout or use CAPITAL LETTERS!

sunstar.com.ph