Modern jeepneys ipadagan sa Colon

LAING subasta ang ipahigayon alang sa modern jeepneys nga ipadagan sa dalan Colon, dakbayan sa Sugbo subay sa gihimong paglusad sa Public Utility Vehicle (PUV) Modernization Program sa Land Transportation Franchising and Regulatory Board (LTFRB).

Matod pa sa direktor sa LTFRB7 Eduardo Montealto Jr. nga himuon ang maong bidding sa sunod buwan ug mihulagway nga mahinungdanon kini ilabi na ang Colon maoy labing karaan nga kalsada sa nasud.

Ang opisyal mipasabot nga sila lang ang mangulo sa bidding, apan ang operators o kooperatiba nga modaog sa bidding mao ang mopalit sa modernize jeepneys.

Ang operator o ang kooperatiba sab ang mopili kon E-jeep nga susama sa dakbayan sa Lapu-Lapu nga solar-powered o kadtong Euro4 nga jeep.

Sa kasamtangan, ang dakbayan sa Lapu-Lapu mao ang adunay nagdagan nga E-jeep sa Sugbo.

Aduna kini’y upat ka rota diin sa kasamtangan, 25 pa ka mga E-jeep ang nanagan.

Nasayran nga tag-25 ka mga e-jeep ang gitagana matag rota sa Lapu-Lapu diin kinahanglan nga makompleto ang operator sa pagpadagan niini sulod sa siyam ka buwan human kini mipadagan sa ilang units. (HBL)

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph