GIKATAHONG sabog niadtong higayona kadtong silingan nga misablig og gasolina sa balay sa iyang gikalalis nga miresulta sa pagka-ugdaw sa 186 ka balay sa Purok Ube, Barangay Gun-ob, Lapu-Lapu City niadtong Hulyo 14 sa kadlawon.
Ang suspek nga si Robin Ebrado alyas Asyong, kapin sa 20 ang pangidaron ang gipangita na karon sa kapulisan human nga gitudlo sa nakasaksi nga nagbitbit og mga plastic bag nga adunay gasolina sa wa pa mi-ulbo ang sunog.
Suod nga higala ni Ebrado nga si Daryl Abrendan nibutyag nga nakasuyop niadtong higayona si Asyong nga nakasugat og lalis sa laing silingan nga nailhan sa pangalang Deborah gumikan lang sa komedya.
Taliwala sa maong panag-away nibahad si Ebrado nga iyang sunogon ang balay ni Deborah.
Inahan ni Ebrado nga si Ginang Maria Lilibeth ang wa makatuo sa gihimo sa iyang anak nga bisan ang ilang pamilya lakip sa nabiktima sa maong sunog.
Moabot sa 220 ka mga pamilya ang apektado sa maong sunog ug 927 kinatibuk-ang gidaghanon sa mga individual ug gibana-bana nga mokabat sa tunga sa milyon ang danyos niini.
Sa laing bahin,ang Department of Social Welfare and Development (DSWD-VII) mi-apod apod og 324 ka mga karton ug sinakong relief goods kagahapon, Hulyo 16.
Ang matag pamilya nakadawat og food packs, gamit pagpangluto, personal hygiene, malong ug trapal.
Sa maong adlawa laing 1,500 ka mga food packs sa Jollibee nga gikan ni Senator Christopher.”Bong” Go atol sa pagpaniudto ug relief goods ingon man cash assistance nga gipaagi ni Mayor Junard Chan. (Miera Claire Jamisola, CNU Comm. Intern)