BISAN kon wa siyay gihuptan nga komitiba sa 15th Sanggunian, apan tutokan ni Konsehal Joel Garganera ang tulo ka mga butang sa iyang pagbalik sa konseho.
Kini ang environment, peace and order ug heritage sa dakbayan human sa iyang proklamasyon sa Martes, Hulyo 16 sa Commission on Elections (Comelec) En Banc.
Si Garganera gi-proklamar sa ika-8 nga andana sa Palacio de Gobernador diin nahimutang ang Comelec En Banc.
Karong alas 11 sa buntag, Hulyo 17, manumpa siya sa 8th floor sa iyang gitawag og palacio de mayor atubangan ni Mayor Edgardo Labella.
Si Garganera nabutang sa ika-10 human sa canvassing sa eleksyon niadtong Mandaue.
Nasulod sa walo ka mga mananaug nga konsehal silang kanhi konsehal Alvin Arcilla ug Sisinio Andales.
Apan gikanselar Comelec ang ilang certificate of candidacy gumikan sa kalapasan sa three-term limit.
Pagkatangtang ni Arcilla, si Konsehal Jerry Guardo, kinsa ikasiyam, ang nihulip kaniya.
Sa kasamtangan, si Guardo ang ika-7 sa final ranking sa Comelec samtang nahimutang sa ika-6 si Konsehal Raymond Garcia.
Usa sa mga higala ni Garganera nipadayag sa iyang paghangop sa pagbalik sa gitawag og Panday sa konseho.
“The Lord is always with you, Sir. You are a good man. I have you in my prayers. The mayor and the good people of Cebu need you because you are a strong pillar of freedom, a genuine voice of the masses and a faithful patriot of our cause,” paghulagway ni City Attorney Rey Gealon.
Si Garganera mobalik sa pag-okupar sa iyang opisina sa 2nd floor sa legislative building nga kasamtangang gigamit ni Konsehal Phillip Zafra gumikan sa 16 ka adlaw niyang pagkawala.
Apan iyang gihulagway nga mahimong magsawo lang una silang duha og opisina kay aduna silay tandem nga gitawag og GAZA 88 nga nagpasabot Garganera-Zafra. (PAC)