MOKABAT sa 1,431 ka drivers sa motorsiklo ug mga sakyanan ang pasakaan na og kaso sa kagamhanan sa Dakbayan sa Talisay.
Magsugod na kini karong adlawa, Hulyo 17. Kini tungod sa paglapas sa lagda sa trapiko sa Siyudad sa Talisay.
Gipahibawo kini ni Jonathan ‘Joy’ Tumulak, pangulo sa City Of Talisay Traffic Operation Development Authority (CT-TODA), atol sa iyang pag-privilege speech atubangan sa konseho atol sa session Martes sa buntag, Hulyo 16.
Ang gidaghanon sa malapason natala sukad Martes sa miaging semana, Hulyo 9, hangtud Hulyo 15, human nga wa usab sila nibayad sa multa.
Sa lagda, ang mga nakalapas sa trapiko hatagan og upat ka adlaw aron mopatim-aw sa buhatan sa CT-TODA, ug pagbayad sa kon pila ang nalatid sa gi-issue nga citation.
Ang wa pagpatim-aw nagpasabot sa pag-waive na niini ug nga kasong kriminal ang mahimo na nga mapasaka batok sa usa ka malapason nga driver ngadto sa piskaliya.
Dungan sa estrikto nga pagpatuman sa ‘no helmet, no driving’ policy, hugot usab nga gipatuman ang ubang lagda sa trapiko, sama sa di pag-obstruct sa ubang sakyanan, pasabot nga kon anaa ka sa left lane, kinahanglang moliko pawala atol sa pag go-signal.
Pagpasabot ni Tumulak nga usa kini ka paagi pagpakita nga seryuso sila sa ilang pagpatuman sa lagda sa trapiko diha sa syudad. (FMD)