MOABOT ngadto sa 35 ka balay ang naabo human miulbo ang dakong sunog niadtong adlaw’ng Lunes Hulyo, 5 sa Mulmac, Macabalan, dakbayan sa Cagayan de Oro.
Sa inisyal nga imbestigasyon sa Bureau of Fire Protection (BFP), nasuta nga nagsugod ang kalayo sa panimalay sa pamilyang Waban nga giingong ang mga gagmayng bata lamang ang nahibilin apan padayon pa kining gisuta.
Tungod sa kakusog sa hangin, gama sab sa uga nga materyales ang pipila ka mga panimalay hinungdan nga dali lang kaayo kining mikaylap nga nalakip pa ang laboratory building sa buhatan sa Bureau of Fisheries and Aquatic Resources (BFAR).
Sa interbyu sa SunStar Superbalita sa usa ka nasunogan sa dapit, iyang giingon nga nagkalayo na dihang ilang namatikdan ang panimalay hinungdan sig-iya na lamang sila sa pagsalbar sa ilang mga butang ug gamit niadtong tungora.
Ang duha ka bata nga unang gitouhang naapil sa sunog ang giingong nakadagan sab human ilang namatikdan ang pag-ulbo sa kalayo.
Naglisod sab sa pag penetrate ang mga bomber gumikan sa kapiot sa dalan sa dapit ug sikit sikit ang mga balay hinungdan didto sila miplastar sa buhatan sa Port Area apan tungod sa kakusog sab sa hangin sagad sa tubig gapaliron hinungdan dili mapuntirya ang sunog.
Nagkadaiyang fire truck ug mga volunteer ang miresponde lakip na ang kasikbit nga lungsod sa siyudad.
Gibana-banang moabot ngadto sa P1.3 milyon ang damyos sa sunog nga natigayon ug gipasalamatang walay kinabuhing nakalas.
Ang mga nasunogan giatiman na karong panahona sa mga opisyales sa barangay ug gipasilong na sa evacuation center, naghatod na usab og inisyal nga ayuda ang buhatan sa City Social Welfare and Development.