MOABOT ngadto sa 29 ka mga empleyado sa kagamhanan Misamis Oriental ang miretero na sa ilang pangatungdanan human sa pila ka tuig nga nagsilbi sa ilang tagsa-tagsa ka mga buhatan.
Niadtong adlaw’ng Lunes, Hulyo 15, atol sa pagpakayab sa nasudnong bandila, gipahalipayan ni Misamis Oriental Governor Bambi Emano ang mga retirees isip pasalamat sa ilang serbisyo sa katawhan sa lalawigan.
Mikabat sa P782,100 ang gitunol ngadto kanila isip pabalon ug pasalamat sa ilang 15 padulong sa 41 ka tuig nga serbisyo.
Gibutyag sa mga retirado nga taod-taod na sila sa nga nangempleyo sa kapitolyo apan daw walay gobernador nga gahatag og gasa o pahalipay ngadto kanila gawas lang ni Emano nga naghatag sab kanila og certificate of recognition.
Matud ni Engr. Luis Buot III, retiree nga nagserbisyo sa kapitolyo sulod sa 23 ka tuig, nagsulti nga sa kasamtangan nga administrasyon wala siyay panahon nga makapahulay “dili sayon, apan makatarunganon.”.
Sa maong gidaghanon nga retirees si Anesia R. Colanse ug Paciencio B. Dagala ang adunay pinakataas nga katuigan sa pagserbisyo sa lalawigan nga moabot sa 41 ka tuig.
“To our retired employees, salamat kaayo sa inyong pagserbisyo sa katawhan sa lalawigan sa Misamis Oriental. You know, it’s not always been very easy... honestly as Governor, sayon kaayo modawat og trabahante pero lisod kaayo magbuhi ug trabahante especially kini nga mga trabahante are very well performers. To all of you who worked with us, thank you very much for the services,” matud ni Emano.