MAHINAMON ug nalingaw ang gatosan ka mga partisipante sa gipahigayong simultaneous tree planting nga kalihokan nga gipasiugdahan sa Aboitiz group sa Barangay Guilang-Guilang, Manolo Fortich, Bukidnon niadtong adlaw nga Sabado, Hulyo 13.
Nasayran nga anaa 3,100 ang natanom diha sa upat ka ektarya tungod kay ang 400 itanom sa laing area nga medyo lisod tamnan aron usab luwas ang mga magtanom.
Giingong tinuig kini nga kalihokan ug inisyatiba aron nga mapadayon ang paghatag og importansiya sa kinaiyahan ug dili lang pagsunod sa kamandoan ilabi na nga duna kini mga planta ug gani gamonitor usab kini sa kadaghanon sa natanom nga kahoy.
“Naa tay 3500 ka seedlings so ang species ana naa tay 2000 ka falcata, 1000 ka narra ug 100 ka durian nga seedlings,” matud ni Daryl Diestro, Hedcor Bukidnon, Inc. Environmental Management specialist.
Samtang mapasalamaton usab ang lokal nga kagamhanan sa maong dapit ilabi na sa Aboitiz Foundation nga dakong natabang sa maong dapit.
“Dako gyud among kalipay nga diri na held ang simultaneous tree planting, tree growing gyud dapat di lang tree planting, kinahanglan magtanom gyud og kahoy para sa safety sa million people, daghan gyung salamat sa Aboitiz Foundation para sa ilang mga tabang sa Barangay Guilang-Guilang,” matud ni Jumawan.
Gilangkoban ang maong kalihokan sa mga residente sa maong komunidad, media gikan sa Cagayan de Oro lakip na sa Philippine Information Agency (PIA) sa Bukidnon, Hedcor Bukidnon Inc., pinaagi nila ni Jude Balatero, operations supervisor, Dennis Miranda, maintenance manager, CENRO Manolo Fortich Florencio Padla, For. III ug UBP CdeO Branch Manager nga si Ms. Shiela Lim kinsa mapasalamaton usab sa maong kalihokan ug sa mga nipartisipar niini.
Giingong ang tinuig nga kalihokan napamatud-an na ang kalamposan niini sa pipila na nga katuigan ug gani niadtong tuig 2018 lang anaa na sa 500,000 seedlings na ang natanom sa Mindanao lamang.