NAPALGANG naglutaw ang usa ka menor de edad kinsa nahanaw mga alas 12:40 sa udto niadtong Hulyo sa Zone 4, Barangay San Simon, dakbayan sa Cagayan de Oro.
Patay si Ronald Benalayo, 15, taga Habitat Phase 1, Pagatpat ning siyudad.
Sa nahipos nga impormasiyon gikan sa Police Station 7 (PS7) sa Bulua, gikabutyag nga niadtong mga alas 11 sa Hulyo 14, niadto sa kilid nga bahin sa suba si Benalayo kauban ang mga klasmeyt niini aron pagpanguha og kawayan.
Giingong unang nitabok sa Zone 1, Camarahan ang mga klasmeyt nga sila si Chester ug John Paul pulos menor de edad ug naulahi ang biktima kauban sila si Niel Arms Strong ug Jerex nga pulos usab menor de edad.
Sa pagtabok na sa tulo kalit lamang nga nadala sa kusog nga tubig si Benalayo ug wala na kini napalgan.
Ang patay nga lawas ang giatiman na sa nahabiling pamilya.