MOKABAT sa 80 ka mga sakop sa Regional Mobile Group (RMG) nga bag-o lang nahimong pulis ibutang sa Cebu Provincial Police Office (CPPO).
Ang mao nga mga pulis dako kaayog ikatabang sa pagpatuman sa kahusay ug kalinaw sa lalawigan sa Sugbo alang sa piniliay sa Mayo.
Kini human usab nagtimbangtimbang ang Commission on Elections (Comelec) sa pagbutang sa pipila ka mga dapit ubos sa watchlist.
Si Cebu Provincial Comelec Director Atty. Lionel Marco Castillano niingon nga posibling ilang ibutang sa watchlist ang mga lungsod sa Tuburan ug Ronda tungod sa kakuwang wa mga pulis.
Si Senior Supt. Erson Digal, pangulo sa CPPO, niingon nga kuwang og mga pulis ang mao nga mga lungsod.
Apan siya niingon nga di na unya kini suliran tungod kay karong pipila ka adlaw aduna na unyay 80 ka mga pulis nga ihatag ang RMG-7 kanila aron idugang sa puwersa.
Gipasabot ni Digal nga dako na kinig matabang sa kakuwang sa mga pulis karon sa kalungsoran sa Sugbo alang sa piniliay.
Matod niya ang 80 ka bag-ong mga pulis ilang ipang-apod-apod sa mga lungsod nga minos og pulis.
Samtang gusto niya nga adunay laing grupo sa mga pulis gikan sa RMG-7 nga magpundo sa kampo aron aduna siyay magamit ug mapadala sa usa ka lugar kon adunay motumaw nga kagubot panahon unya sa adlaw sa eleksyon.
Labot sa ika-upat nga distrito sa Sugbo si Digal niingon nga ang duha ka mga team sa Special Reaction Unit (SRU) magpabilin sa maong distrito.
Nagkanayon si Digal nga ang SRU magbase sa siyudad sa Bogo sa karaan nga kampo sa army nga anaa ra usab sa compound sa Bogo Police Station.
Ang lungsod sa Daanbantayan ug Bogo city bantayanan kaayo nga mga lugar.
Hinuon mas init ang sitwasyon karon sa Bogo human niasumer makadiyot sa katungdanan si Engr. Augusto Corro hulip unta kang Mayor Sun Shimura.
Kini human gipatuman ang writ of execution ni Judge Antonio Marigomen, apan gibawi ra sab kini human makaapelar sila si Shimuta ug Bise-Mayor Maria Luisa Loot. (DRT)