BABAYENG tinun-an sa usa ka unibersidad sa Siyudad sa Sugbo nagpa-blotter sa Mabolo Police Station human giingong siya gidagit sa mga sa lalakeng sakay sa usa ka puti nga van ug pagkahuman siya gilugos.
Apan nahibulong ang kapulisan kay daghang mga tawo sa dapit nga nahitaboan ug oras, apan way bisan usa nga nitaho o nialarma kanila.
Grabe usab kahuot ang trapiko sa dapit sa mao nga oras.
Ang hepe sa Mabolo Police Station, Police Captain Dexter Basirgo, nipahibawo sa Superbalita Cebu nga niadtong milbayng Mierkules, Hulyo 10, alas 5 sa hapon, giingong gidagit ang dalaga daplin sa dalan.
Nagbaktas ang 19 anyos nga dalaga sa dalan ilawom sa flyover sa Governor Cuenco Avenue sa Barangay Banilad Cebu City padulong nga mopauli apan kalit lang niabot ang puti nga van.
Giingong nikanaog ang duha ka mga lalake nga nagtaptap sa ilang mga nawong ug gitabangan siyag gunit sa mga kamot ug gisampongan iyang baba.
Gipugos siyag pasakay sa puti nga van ug didto sa sulod gi-blindfold og panapton ang iyang mga mata. Gidala sya sa wa matino nga lugar.
Bisan sa iyang pagpakiluoy nga buhian siya, wa manumbaling ang mga lalake.
Didto ra usab sa sulod sa van gihimo ang paglugos kaniya.
Human sa pagpang lugos gihatod ra usab siya sa dapit diin siya gisignit.
Human sa pagpanglugos, gibalik ra usab siya sa gawas sa tunghaan apan wala na siya mahinumdom pa sa dagway ug plate number sa van.
Usa lang ka tawo ang nihilabot kaniya base sa iyang gitug-an sa Women and Children Protection Desk sa Mabolo police station.
Giingong gihulga usab siya sa rapist nga kon mosumbong sa pulis, siya ug iyang pamilya patyon.
Gipasubay na nila ni Basirgo ang mga kuha sa CCTV camera sa dapit. Apan wa silay makuha tungod kay mga guba.
Natingala si Basirgo gumikan kay walay bisan usa ka tawo nga nakakita sa giingong pagdagit.
“Wala gyuy nakakita nga unta alas singko pa man na sa hapon. Daghan gyud nang tawo diha dapita,” matod ni Basirgo.
Ang hepe sa Talamban police station Police Captain Jonathan Taneo miklaro nga unang nagpa-blotter ang dalaga sa ilang buhatan.
Apan gi refer kini sa Mabolo Police Station sanglit didto kini nahitabo sa Banilad nga area sa Mabolo.
Bisan pa niini, moabag sa imbestigasyon ang Talamban police.
Ilang subayon ang mga kuha sa CCTV camera sa dapit nga posibling giagi-an sa giingong puti nga van nga gitumbok sa biktima.