HUGOT nga gihimakak sa kanhi hepe sa Criminal Investigation and Detection Group (CIDG) Central Visayas Police Colonel Marlon Tayaba nga ilang gi-clear sa bisan unsa nga kaso si kanhi Daanbantayan mayor Vicente Loot.
Sukwahi kini sa migawas nga balita nga aduna na'y resolusyon ang CIDG Central Visayas nga iyang gipirmahan nga gipawala'y sala ang gipasanginlan ni President Rodrigo Duterte nga drug protector sa Kabisay-an.
Matud ni Police Colonel Tayaba nga wala sila mopagawas og investigation report sa iyang panahon sa dihang siya pa ang nahimong Regional Chief sa CIDG Central Visayas niadtong 2016.
Naalarma siya sa migawas nga balita nga aduna'y dokumento nga gi-attach ni Loot sa iyang suwat hangyo sa National Bureau of Investigation nga molusad og independent investigation kaniya.
Kini human nga ginganlan na usab siya ni Duterte sa iyang mga speech didto sa Luzon.
Giklaro ni Tayaba nga wala sila modeklara kang Loot nga dili sad-an, ug dako nalang ang iyang kakurat nga aduna'y balita nga migawas dinhi sa Sugbo.
“Wala kaming desisyon na ganyan na na-clear na si former mayor Vicente Loot at 'di ko gagawin yan. Hindi totoo ang lumabas na balita na na-clear ko si Loot, wala,” matud ni Tayaba.
Si Tayaba mao karon ang provincial director sa kapulisan sa probinsya sa Iloilo.
Nasagmuyo siya nga migawas ang maong balita nga wala siya makuhai sa iyang habig aron matubag ang pangutana labot sa imbestigasyon kang Loot.
Matud niya nga sa dihang siya ang nahimong CIDG Central Visayas chief, matinud-anon siya sa iyang trabaho diin iyang gipasigarbo ang mga nakab-ot nga accomplishment.
Gihimakak ni Loot ang pasangil kaniya nga matud pa aduna siya'y kalambigitan sa ilegal nga drugas sa Visayas region.
Ang daghang mga kabtangan nga nakapangalan sa pamilyang Loot giingong naangkon kini niadto pang 1991 ug matod pa aduna sila'y negosyo.AYB (Superbalita Cebu)