ANAA na sa ikaduhang hugna ang giimplementar nga Hazard Reduction Plan (HRP) sa Apo Land and Quarry Corporation (ALQC) subay sa nahitabo nga pagdahili sa yuta sa dakbayan sa Naga niadtong 2018.
Kini mao ang gibutyag sa acting regional director sa Mines and Geosciences Bureau (MGB) 7 nga si Efren Carido.
Matod ni Carido nga hingpit nang nahuman ang unang hugna sa maong HRP nga naglakip sa clearing sa Pangdan River, pagpatukod sa Sindulan Safety Wall ug ang pagbutang sa drainage system aron malikayan ang posibleng mud flow sa lugar kon ugaling mobundak ang kusog nga uwan.
Ang ikaduhang hugna nga giimplementar karon naglakip sa paghimo og access road sa lugar.
Samtang, nagpadayon ang gihimong re-assessment karon sa mga sakop sa MGB sa kaulohan may labot niining pagtan-aw pagbalik kung mamahimo pa bang mausab ang re-classification sa mga gideklarar nga "no build zones" hilabi na katong duol sa Ground Zero sa Sitio Sidulan sa Barangay Tina-an.
Kini nga re-assessment ilang gipahigayon agi’g tubag sa hangyo sa lokal nga kagamhanan sa dakbayan sa Naga.
Gikatakdang mopagawas sa resulta sa maong reassessment ang MGB sa ikaduhang semana sa buwan sa Agusto. (HBL)