GIKUHA sa Milwaukee Bucks ang maguwang sa ilang labing pambato nga si MVP Giannis Antetokounmpo alang sa ilang kampanya sugod sa sunod season sa National Basketball Association (NBA).
Gianunsyo sa Bucks nga nakapirma na si Thanasis Antetokounmpo og minimum contract nga molanat og duha ka mga tuig.
“Thanasis is a young player with great experience at the top level overseas,” matod ni Bucks general manager Jon Horst.
“He brings toughness, athleticism, character and a high IQ. We are thrilled to have him join the Bucks.”
Ang 6’7’ nga si Thanasis nagduwa sa Panathinaikos sa Greek Basket League sa miaging duha ka mga tuig diin natabangan niya ang iyang team nga makalangkat og duha ka sunodsunod nga kampiyunato.
Nag-average si Thanasis og 4.9 puntos ug 2.5 rebounds sulod sa 55 ka mga duwa sa Greek Basket League ug EuroLeague. Siya maoy napiling Greek Basket League Most Spectacular Player niadtong 2017-18 season.
Sa wa pa kini, nagduwa una si Thanasis sa Andorra sa Liga ACB sa Spain.
Si Thanasis gipili sa New York Knicks sa 2nd round niadtong 2014 rookie drafting isip 51st overall. Nakaduwa siya sa Knicks niadtong 2015-16 season. (AP, ESL)