Mantilla impresibo nga gilihian sa UP

IMPRESIBO ang Sugboanong si Jaybie Mantilla sa iyang unang duwa isip sakop sa University of the Philippines Fighting Maroons sa ilang pagsalmot sa Buddha’s Light International Association (BLIA) Cup didto sa Taiwan niadtong Martes.

Ang kanhi sakop sa University of San Jose Recolets (USJ-R) Jaguars nga nahimo usab nga most valuable player (MVP) sa Cebu Schools Athletic Foundation, Inc. (Cesafi) mitapos sa duwa nga may 11 puntos ug walo ka rebounds sa ilang 76-61 nga kadaugan batok sa National Taiwan Sports University.

Si Kobe Parasa maoy nangulo sa Fighting Maroons nga may 15 puntos, siyam niini sa second quarter.

Ang laing kanhi sakop sa University of the Visayas Green Lancers nga si Jun Manzo mipuga usab og 13 puntos alang sa UP kinsa miduwa nga wala ang ilang mga pambato nga sila si Juan Gomez de Liano ug Ricci Rivero kinsa wala makuyog sa team tungod sa ilang mga angol.

Sa interview, giangkon ni Mantilla nga kaikag ug sagol kulba ang iyang gibati sa iyang unang pagduwa sa UP. Apan bisan pa niini, iyang gipakita ang iyang dinuwaan nga iyang napakita sa Cebu.

Matod niya nga duna siyay mga adjustment nga gihimo aron makuha lang ang sistema sa ilang coach bisan pa man og limitado ang iyang playing time.

Iyang gipasalig nga iya gyud nga buhaton kutob sa iyang mahimo aron makatabang sa team.

Ikasangka sa Fighting Maroons sa sunod nilang tahas ang Huaquiao University. (JBM)

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph