HUMAN gihimo ang serye sa audition sa nagkadaiyang parte sa nasud.
Sa wakas, nakapili na gyud og bag-ong nilalang nga motulon sa bato, uban sa pagsinggit og Darna!
Kini ang Star Magic talent nga si Jane de Leon.
Ang balita, gikumpirma ni Star Cinema managing director Olivia Lamasan Miyerkules, Hulyo 17.
“We have found a new Darna and she is none other than Jane de Leon!” ni Lamasan.
Ning bag-o lang, si Jane maoy nagdala sa role as manghud ni Jericho Rosales sa Kapamilya prime-time series Halik.
Kinsa si Jane?
Parte si Jane sa It’s Showtime’s girl group nga GirlTrends.
Mieksena na sab siya sa mga shows nga Magpahanggang Wakas (2016), La Luna Sangre (2017), ug movies nga The Debutantes (2017) ug Walwal (2018).
Miapil sab siya sa bootcamp for Simon Fuller’s global pop group, Now United, uban sila Ylona Garcia, AC Bonifacio, ug Bailey May.
Hulipan ni Jane sa papel nga Darna si Liza Soberano.
Big break
Kung kaniadto agi-agian lang ang dalaga, karon siya na ang bida.
Gibutyag ni Lamasan nga usa si Jane sa gatusan nga nag-audition sa role.
Dugang sa direktor nga perfect sab sa dalaga ang role.
Gidugang sa direktor nga atol sa audition mibilib sila sa kaikag sa aktres nga dalhan ang papel isip Darna.