MAGUINDANAO PROVINCE -- Padayon pang gisusi sa mga awtoridad ang hinungdan sa pagpatay sa usa ka collector alas 10 sa buntag niadtong Martes, Hulyo 16.
Giila ang biktima nga mao si Jhon Martin Alba Calonia, 36, minyo, collector sa Nickel lending firm ug molupyo sa 2nd Road, Virgo Subdivision, Barangay Rosary Heights 9 sa Cotabato City.
Sa taho gikan sa Maguindanao Police Provincial Office, nasayran nga nahitabo ang pagpamusil sa biktima samtang sakay siya sa iyang motorsiklo sa Sitio Santillan, Brgy. Poblacion, Sultan Mastura sa nahisgutang probinsiya.
Sumala pa nga kalit lang siyang gipusil sa duha ka mga lalaking wala mailhi gamit ang .38 revolver tumong sa ulo ug dughan hinungdan sa iyang hinanaling kamatayon. (Edgar E. Fuerzas)