SAKTO gyud ang kantang “Too Much Love Will Kill You” sa nahitabo sa tulo ka tawong gipatay pinaagi sa pagdunggab sa usa ka lalaking giingong nanghinobra ang selos nga gibati.
Miyerkules, Hulyo 17, miunong sa kasakit ang madag-umong panahon, human giayo-ayo og dunggab patay sa suspek nga si Daryl Pakna Aguilar, 22, lumad nga taga Purok 6, Barangay San Jose, Compostela, Compostela Valley Province, ang mga biktima nga giilang sila Jessa May Tecson Abitona, 25, kapuyo sa suspek, usa ka call center agent; igsuon niyang si Jesybell Tecson Abitona, 20, estudyante ug ang nakitulog kanila nga si Caryl Jiff Salianon, estudyante.
Sumala sa taho gikan sa Talomo Police Station, mga biktima nga pulos lumad nga taga Manay, Davao Oriental ug nag-abang sa balay ni Alma Pateño, namatay tungod sa daghang mga samad sa lawas.
Base sa taho sa pulis, mga alas 5:30 sa buntag, nangayo’g tabang ang suspek sa mga caretakers sa Sunrise Village, Matina Crossing nga sila si Sheila May Datuon Ayudtod ug Michael Jardin ug namahayag nga napatay niya ang mga biktima.
Sa dihang nisulod si Jardin sa lawak sa mga biktima aron susihon, iyang nakita silang nangaligdas na ug naligo sa ilang mga kaugalingong dugo.
Ang suspek nga si Aguilar nangayo sab og tabang kang Jardin gumikan matud pa gidunggab siya sa usa sa mga biktima apan nasayran nga nisulay siya nga magdunggab sa iyang kaugalingon human nahimo ang krimen.
“Nag-attempt mag-suicide raw ‘yung suspect after his commission of the crime,” ni Davao City Police Office director Senior Superintendent Alexander Tagum sa text message niya sa SunStar Davao.
Sa pagpanubay sa kapulisan, giingong nag-away na si Aguilar ug kaipon niining si Jessa May sa wala pa mahitabo ang duguong insidente.
“According sa investigation may prior na mainit na pagtatalo yung suspect at ang isa sa victims na live-in partner niya parang selos raw. Maraming witness sa incident,” dugang ni Tagum. (Rhona Goc-ong-VIllariasa)