15 na patay sa dengue



KINSE na ang gitahong namatay sa dengue sa Davao Region.

Kini subay sa report gikan sa Department of Health (DOH)-Davao gikan Enero 1 ngadto Hulyo 17 ning tuiga.

Gikan Enero 1 hangtud Hulyo 15, 2019 miabot na og 3,496 ang kaso sa dengue sa rehiyon, mas taas sa 1,970 niadtong 2018.

Sa paghimay-himay sa datus, ang Davao City maoy dunay pinakadaghang kaso sa nataptan sa dengue.

Sa 2018, nakatala ang siyudad og 909 ka kaso, diin upat ang patay, apan sa 2019, misutoy kini sa 1,630 ka kaso ug unom ang patay.

Misunod ang Compostela Valley nga dunay 701 ka kaso, apan way patay, itandi sa 421 ka kaso ug duha ang namatay niadtong 2018.

Ikatulo ang Davao Oriental nga may 562, usa ang nakabsan sa kinabuhi; diin ang ihap halos midoble niadtong 2018 nga mitala lang og 223 ka kaso, usa ang patay.

Nabutang sa ikaupat ang Davao del Norte nga may 464 ka kaso, duha ang patay; mas taas gihapon itandi sa datus niadtong 2018 nga 291 lamang samtang usa ang namatay.

Misunod sab ang Davao del Sur nga 114 ka kaso, usa ang patay sa 2019; itandi sa 99 ka kaso, usa namatay sa 2018.

Samtang sa Davao Occidental miubos ang kaso gikan sa 27, ug way patay niadtong 2018, sa 24 ka kaso, usa ang namatay karon nga tuig.

Si DOH-Davao director Annabelle Yumang nagsulti atol sa media forum Miyerkules, Hulyo 17, sa conference room sa may J.P. Laurel Avenue, nga unom ang namatay gikan sa Davao City, upat gikan sa Island Garden City of Samal (Igacos), usa sa Don Marcelino, usa sa Kiblawan, usa sa Lupon, usa sa New Bataan, ug usa sab sa Tagum City. Kini nga datus mas taas itandi sa natala niadtong milabay nga tuig nga siyam ang namatay.

Matud ni Yumang nga dunay sundanan ang giobserbahan alang sa mga kaso sa dengue matag tulo hangtud upat ka tuig, ug ang maong pagsutoy gilauman na.

“We will not wait that we will surpass the threshold of our cases. That is why we need to stop dengue in region 11,” pagklaro niya una moabot sa epidemic threshold nga aron nga modeklara og outbreak.

Sayo niini, gisulti sa DOH nga ang Davao region apil sa mga rehiyon nga gimonitor human nilapas sa alert threshold o ihap sa kaso sa dengue nga potensiyal sa outbreak. Sa pagkakaron, sa Davao region, ang Igacos lang ang nideklara og dengue outbreak tungod sa nitaas nga ihap sa mga kaso niini.

Gikompirma ni Yumang nga duna nay paghuot sa Southern Philippine Medical Center (SPMC) tungod sa pagsulod sa mga indibiduwal nga dunay simtomas sa dengue.

Sa pikas bahin, si DOH 11 Regional Dengue Control and Prevention program manager engineer Antonietta Ebol nagsulti kagahapon nga bisan una ang Davao nilapas sa alert threshold, duna nay mga paningkamot nga ilang gihimo aron nga batokan ang dengue.

Niadtong Pebrero, gibutyag ni Ebol nga nakiglambigit na sila sa ilang mga partners sa local government units gikan probinsiyal, munisipalidad hangtud na sa barangay.

Ning bag-o sab ang DOH sa unang higayon mideklara sa National Dengue Alert tungod sa paspas nga pagsaka sa ihap sa mga nataptan sa sakit.

“This is the first time we’re declaring a national alert. The objective is very clear, we want to raise awareness among the public and more importantly in communities where signs of early dengue increases are evident. So, this is something that we think is an important announcement,” ni Health Secretary Francisco Duque III sa usa ka press conference didto sa kaulohan.

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph