ORMOC City, Leyte - Mokabat sa 50 ka taxi ang mobiyahe na unya sa Ormoc City sa di pa mahuman ang 2019.
Kini ang pahibawo sa operations manager sa mga taxi atol sa interview sa programa sa radyo nga Krusada ug Superbalita Cebu nga si Julius Jospeh Polea.
Matod ni Polea, usa pa lang ka unit ang nagbiyahe karon sa Ormoc gumikan kay mao pa lang ang kumpleto sa dokumento.
Apan karong adlawa, Huwebes, Hulyo 18, o ugma, duna na usay mga 10 ka taxi ang i-dispatch sa dakbayan.
Gibutyag usab ni Polea nga sama ra sa Dakbayan aa Sugbo ang flag down rate sa taxi nga P40. Duna usay dugang nga P13.50 matag kilometro ug waiting rate nga P2 matag minuto.
Subay niini, gisugilon ni Polea nga kon moabot na sa 50 ka units o makumpleto na ang mga taxi nga mo operate, makig partner na kanila ang Grab.
Ang mga taxi dili lang sa sulod sa Ormoc magbiyahe, apan mamahimo usab mogawas sa dakbayan.
Gani, nitumaw ang reaksyon sa pagdagsa sa mga taxi nga mawad-an og panginabuhian ang mga traysikol drayber. (JKDP)