ORMOC City, Leyte - Gipasigarbo sa Philippine Drug Enforcement Agency (PDEA) 8 ang ilang accomplishments sa first semester ning tuiga.
Matod sa PDEA 8, gigamit nila ang tulo ka mga approach nga mao ang supply reduction, demand reduction ug harm reduction.
Ubos sa supply reduction, gikan Enero hantod Hunyo, ang PDEA 8, nakapahigayon og 370 ka anti drug operations uban sa laing law enforcement unit.
Nasikop ang 369 ka drug personalities, nasakmit ang 406.1984 gramos nga shabu ug 27.6723 gramos nga marijuana.
Niabot usab sa 42 ka search and seizure operations sa mga jail facilities ang ilang gilunsad.
Gipanghingusgan usab sa PDEA 8 ang pagpugong sa abusong paggamit sa mga tambal ingon man pag-monitor ug paghatag og lisensya sa mga controlled precursors and essential chemicals nga pwede magamit sa mga illegal drug manufacturers.
Ubos sa demand reduction, gikan sa Enero hangtod Hunyo, miabot sa 206 ka meetings ang natambongan sa PDEA, 407 ka civic awareness ug 1,459 multi media efforts. Samtang sa harm reduction, gilusad usab sa PDEA ang programs sama sa pagtukod og balay silangan alang sa mga surrendrees ug mga ni-avail sa plea bargain agreement.
Sa Hunyo, upat ka balay silangan ang natukod: naa sa Tacloban City, Calbayog City, Barugo, Leyte ug Laoang sa Northern Samar.
Gipaubos usab sa PDEA sa suprise drug test ang 1,141 ka mga tawo sa transportation sector diin unom ang nagpositibo ug gipaubos sa rehabilitasyon.
Dakong gipasigarbo sa PDEA 8 nga sa 2,868 ka mga barangay sa rehiyon nga apektado sa ilegal nga drugas, 2,303 niini drug cleared na.
Matod sa PDEA, di sayon ang pagkab-ot sa maong datos gumikan sa pipila ka pagsuway, apan nagpasalamat sila sa publiko sa pag kooperar nga masulbad ang problema sa drugas. (JKDP)