INANAY nang nailhan sa Visayas area ang Nourskin Corp. sa ilang mga produkto gikan sa sa skin care, cosmetics, nutri-ceuticals ingon man household cleaning products.
Gisaulog niadtong Sabado, Hulyo 13 ang 1st grand anniversary celebration ingon man ang paglusad sa ilang bag-ong marketing scheme nga gipahigayon sa Diamond Suites Cebu.
Si Richard Apresto, marketing director sa Nourskin, nipahibawo nga nakasulod na ang ilang produkto sa Visayas region.
Ang Nourskin unang gilusad sa Davao City niadtong 2007.
Mapasalamaton ug nakadayeg si Apresto sa Cebu group nga iyang gihulagway nga aktibo nga mapalapdan pa ang ilang distribution sa ilang kapin sa 100 ka mga nagkadaiyang produkto ngadto sa mga Bisaya nga konsumidor.
“Ang atong edge sa ubang produkto diha sa merkado, we take pride nga ang atong ingredient organic-based gyud ta. Wa tay synthetic compound. so ang atong mga active ingredients are derived from plant, fruit ug herb extract,” pahibalo ni Apresto sa dihang nahinabi sa Superbalita Cebu.
Gisalikway sab ni Apresto ang giingong mas mahal ang ilang produkto itandi sa uban, samtang kadtong ilang mga dealer o distributor makapahimulos sa 20 porsento nga discount sa matag produkto.
“Reasonable price gyud ta, actually mas barato pa gani ta,” matod pa ni Apresto atol sa press conference.
Dugang pa niya nga dili lang dire sa nasud mikatap ang ilang service center kay adunay sab silay distributor didto sa HongKong ug Macau. (FVQ)