DILI layo ang estilo sa liderato ni Lapu-Lapu City Mayor Junard “Ahong” Chan ngadto ni Manila City Mayor Francisco Domagoso alyas Isko Moreno.
“Isko is hands-on gyud siya sa problema sa iyang siyudad. On our side siguro naay similarity, kay kita nakatutok ta sa tanan (problema sa dakbayan),” matod ni Chan sa dihang nahinabi sa Superbalita Cebu.
Matod sa mayor, dili na kini bag-o alang kaniya kay sa dihang barangay kapitan pa siya sa Pajo mangunay na siya sa pagsulbad sa mga suliran ug asa ang panghitabo sama sa sunog, adunay ronda batok illegal drugs ug uban pa anaa ang iyang presensiya.
Gani, pipila pa lang ka adlaw nga mi-asumir siya sa katungdanan isip mayor sa Lapu-Lapu personal niyang giduaw ang City Hospital aron sa pagsusi kon nganong adunay kalangay sa paghuman sa gihimong expansion niini.
Karong adlawa, Hulyo 18, susihon ni Chan ang merkado publiko sa Barangay Poblacion human nga ang ubos nga bahin gigamit na pagbalik sa manindahay og isda ug karne.
Buot niyang kahawanan sa mga manindahay ang daplin kalsada sa maong merkado diin sila kanhi girelocate samtang giayo ang edipisyo sa maong merkado.
“We have our own style of leadership. Nakita naman na during my term as barangay kapitan, I worked 24/7,” nagkanayon ang opisyal.
Sa susamang kalambuan, usa sa tutokan ni Chan ang lahi nga approach nga ipatuman batok sa illegal drugs.
Kon ang naandang pamaagi nga ang drug pusher maoy sigurohon og sugpo, apan namatikdan nga sa higayon nga adunay madakpang pusher, laing player ang mopuli sa pagnegusyo sa gidiling drugas. (FVQ)