GIMANDUAN sa Directorate for Investigation and Detective Management (DIDM) sa Philippine National Police (PNP) sa Camp Crame ang Police Regional Office (PRO) 7 sa pag-imbestigar kanila ni Police Major Chuck Barandog ug kanhi Cebu City Police director Royina Garma.
Kini may labot sa operasyon sa kapulisan niadtong Pebrero 2019 diin duha ka mga barangay tanod ug usa ka asawa ang nangamatay sa police operation sa Barangay Lusaran, Dakbayan sa Sugbo.
Ang DIDM nipadala og komunikasyon sa PRO 7 aron paghimo sa imbestigasyon batok kang Barandog, kinsa maoy nangulo sa operasyon niadtong Pebrero 22 sa kaadlawon.
Nangamatay sa operasyon mao sila si Renato Goc-ong ug Reynaldo Laguna, mga barangay tanod sa Lusaran.
Lakip sa namatay ang asawa ni Goc-ong nga si Emma.
Giingon nga ang duha ka mga tanod ningsukol sa mga sakop sa City Mobile Force Company (CMFC) nga gipangulohan ni Barandog.
Usa usab ka pulis ang naangol sa mao nga hitabo.
Usa sa mga anak sa magtiayong Goc-ong nipasangil nga bisan wa na mosukol ang ilang amahan, gipusil gihapon sa kapulisan.
Si PBrig. Gen Omega Jireh Fidel, executive officer sa DIDM, nimando niini human nipadangat og suwat ang 14th Sanggunian pinaagi kang Sangguniang Panlungsod (SP) Secretary Roy Vincent Alix gumikan sa privilege speech ni kanhi konsehal Mary Ann De Los Santos nga gipadala sa SP niadtong Mayo 22.
Sa privilege speech ni De Los Santos, iyang gipasanginlan si Barandog ug mga sakop nga nakahimo og misconduct.
Lakip sa ipa-imbistigar mao si Garma, kinsa general manager na karon sa Philippine Charity Sweepstakes Office (PCSO).
Gihatagan sa DIDM ang PRO 7 sa paghimo sa ilang imbestigasyon ug pagduso sa ilang resulta labing dugay sa Hulyo 30, 2019.
Samtang ang 15th Sanggunian sa dakbayan sa Sugbo pinangulohan ni Vice Mayor Michael Rama niingon nga maghuwat sila kon unsay mogawas nga resulta sa imbestigasyon sa PRO 7. (PAC)