DUL-AN P9 milyones nga balor sa ilegal nga drugas nasakmit sa mga sakop sa Guadalupe Police Station gikan sa usa ka 21 anyos nga babaye sa Barangay Duljo Fatima, Dakbayan sa Sugbo.
Apan si Judy Ann Mojado Longakit, 21, taga B. Aranas Extension, Barangay Duljo Fatima, nihimakak nga iyaha ang drugs.
Duna siyay live-in partner nga drug pusher sa maong dapit.
Nakuha kang Judy Ann ang usa ka pakete sa gituohang shabu nga maoy iyang gitunol sa pulis nga nagpatuo nga kustomer.
Sa dihang gipahibawo na nga buy bust ang hitabo, gipusasan kini dayon.
Sa pagsusi sa paper bag nga bitbit ni Judy Ann, nakuha sa sulod niini ang tulo pa ka dagkong putos ug usa pa ka extra large nga motimbang ang tanan og 1.3 kilos nga mobalor ang tanan og P8.8 million.
“Pag-abot nato naka transact ta after sa consummation. Gidali nato sa pag check nga iyang gi bitbit pud nga paper bag nga we believe nga subject for distribution na pud to siya,” matod ni Police Major Dindo Alaras, hepe sa Guadalupe Police Station.
Matod ni Alaras, milutaw ang ngalan ni Judy Ann sa mga milabayng dakop nga sila ang kuhaanan.
Gihimakak ni Judy Ann nga iyaha ang drugas.
Iyang gitudlo ang live-in partner apan matod ni Alaras nga si Judy Ann ang nitunol kanila sa illegal nga drugas.
“Siya man gyud ang nagtunol. Posible man sad nga nabiktima lang siya or kauban gyud siya. Mao nang siya ang na subject sa atong buy bust operation,” dugang ni Alaras.
Si Police Colonel Gemma Vinluan, hepe sa Cebu City Police Office, nimando sa Guadalupe Police Station nga palawman pa ang ilang imbestigasyon kon asa gikan ang supply.
“Ang sabi ko sa aking mga staff, kung itong mga station commanders na ito hindi makapag-deliver ng result, i-relieve ninyo. Mas gugustohin ko ang SPO1, SPO4 Lieutenant, Major, Kapitan o Master Sergeant ang mag station commander kaysa mag lagay tayo ng station commander na hindi nag pe-perform,” matod ni Vinluan.
Kini na ang labing dako nga kantidad sa illegal nga drugas nga nasakmit sa iyang mga sakop sukad siya milingkod sugod sa miaging semana.