MOPADALA og suwat si Lapu-Lapu City Mayor Junard “Ahong” Chan sa ulohang buhatan sa Land Transportation Franchising and Regulatory Board (LTFRB) kalabot sa iyang pagsupak sa pagpadagan sa mga electronic jeepney (E-Jeep) sa Dakbayan.
Matod ni Chan nga alang kaniya di haom ang mga E-Jeep sa kadalanan sa dakbayan sanglit makamugna lang kini og dugang kahuot sa trapiko.
Buot usab ni Chan nga maklaro sa LTFRB ang rota sa naasoyng mga sakyanan aron di maapektohan ang mga drayber sa tricycle ug multicab sa ilang pangita sa di pa hingpit nga padaganon.
Gibutyag ni Chan nga nakadawat siya og daghang mga reklamo sa mga tricycle ug multicab drivers nga apektado ang ilang kita sanglit ang E-Jeep way klarong rota sa dakbayan, bisag asa lang maabot.
Dugang 75 ka mga E-Jeep ang moabot sa dakbayan nunot sa modernization program sa Department of Transportation ubos sa administrasyon ni Presidente Rodrigo Duterte.
Ang maong gidaghanon maoy idugang sa kasamtangang 25 ka mga unit sa E-Jeep nga nagdagan sa dakbayan sukad niadtong Abril.
“I will oppose sa coming 75. In fact, this 25 I’m opposing because it has affected the livelihood of the tricylce and multicab drivers,” matod ni Chan.
Sugyot ni Chan nga kon ugaling padaganon ang mga E-Jeep sa dakbayan, mas maayo adto na lang kini sulod sa Philippine Economic Zone Authority (PEZA) dili sa kadalanan sa dakbayan.
Iyang gihulagway nga gagmay ra kaayo ang mga dan alang niining maong mga sakyanan.
Niining paagiha, mamenosan ang trapik sa dakbayan ug di usab apektado ang kita sa mga ordinaryong drayber.
“Tulo man ni atong Peza. Naay Mepz 1, Mepz 2, Mepz 3. Atong bahinon ning mga E-Jeep. Adto lang sila didto magtuyok-tuyok,” pasabot ni Chan.
Ang United Drivers Operators Transport Cooperative (Udotco) nga maoy nag-manage sa pagpadagan sa E-jeeps, nibutyag nga igo ra sila nituman sa modernization program nga gipatuman sa nasudnong kagamhanan.
Matod ni Malvin Arias, chairman sa Udotco, nga mga tricycle driver usab ang drayber sa mga E-Jeep sa pagkakaron.
“Sa ako lang side, dapat pud siguro tan-awon nato ang side sa commuters pud, dili kay ang side lang sa tricycle drivers,“ matod ni Arias.