NAKALUTAN ang mga bukog sa usa ka babaye human sa search and retrieval operation niadtong Hulyo 15 sa Barangay Adtuyon, lungsod sa Pangantucan, Bukidnon.
Ang hiniusang operation gihimo sa 1st Special Force company, 1st Special Forces Battalion ug Pangantucan Police Station human ang usa ka bag-o lang misurender nga gitouhang sakop sa New People’s Army (NPA) nga si alyas Bandido adunay mga rebelasyon.
Kini giingong kalabot sa pagpatay sa ilang kauban nga si Merlyn Hinganon, alyas Genevive kinsa usa ka medic sa walhong grupo.
Dugang ni alyas Bandido nga giingong gipatay kini sa ilang sub-leader sa NPA niadtong Hunyo 2018 ug gilubong sa maong barangay.
Giingong giluba si Genevive sa giilang si Jovelito Tonlacan Pontillas alyas Zelong/Jovy/CG/Tiga kinsa Vice CO 1 sa Sub-Regional Operation Command, Sub-Regional Committee 4, NCMRC. Kini gumikan kay si Genevive gidudahang usa ka spy sa gobyerno tungod sa sunod-sunod nga mga misurender.
Positibong nakalutan ang patay’ng lawas niini ug karon gidala na sa Pangantucan Funeral Homes alang sa imbestigasyon ug proper disposition.
Dugang ni Bandido nga human giangkon sa ilang lider ang pagpatay niini dili na siya makakatulog sa iyang gibating konsensya.
“Gigukod ako sa akong konsyensya, nga sugod atong nakita nako ang walay luoy nga pagpatay pinaagi sa pagdungab kay Genevive sa among kumander. Nga abi nila ahente sya sa sundalo kaya gipatay sya, nga ilang sulti nga trahidor kuno sa kalihukan.” matud niini.
Giingong bakak ang pagpasangil kang Genevive gumikan kay boutan.
“Bakak man nila to, sa tinuod lang buotan man kaayo si Genevive, nakita ko pa ang iyang paghilak sa pangayo nya ug tabang, nga wla man mi mahimo dahil sa kahadlok niadtong panahona. Kaya nakahuhuna ko nga magsurender na lang, magbalik sa sabakang gobyerno para makadawat pud ko sa programa ni Presidente Duterte nga
daghan na tabang iyang gihatag sa tanang surrenderees nga ang uban nahimo nang sundalo.” matud pa niini.
Sa iyang bahin ni 1st Special Forces Battalion commander Lieutenant Colonel Sergio Macarandan Jr. niingon nga wala pa gihapon nakarekober ang walhong grupo sa ilang pagka paranod nga adunay kauban nga spy kanila.
“NPAs have not recovered yet from their paranoia of being spied since ‘80s, they continued purging in their ranks to the suspected spies through intimidation, torture and death,” matud niini.