USA ka 17-anyos nga tinun-an sa usa ka tunghaan sa bukirang dapit sa Dakbayan sa Sugbo ang mireklamo nga gilugos sa usa ka 24-anyos nga lalaki sa Barangay Sirao alas 7 sa gabii, Miyerkules, Hulyo 17, 2019.
Una siya nga misumbong sa iyang inahan human sa insidente nga dali nga naka-report sa Talamban Police Station.
Milusad og manhunt operation ang kapulisan uban sa mga Barangay Tanod sa Sirao alas 10 sa gabii nga miresulta sa pagkasikop niini didto sa ilang balay.
Matud ni Police Corporal Mary Joy Daligdig sa Women and Children Protection Desk sa Talamban Police Station nga positibong gitudlo sa biktima ang suspek nga mao'y nanglugos kaniya.
Gipakita pa niini ang mga kiss mark nga mabulit ang tibuok lawas sa dalaga diin ang labing dako naa sa iyang walang dughan.
Giingong nagkita sila sa usa ka lugar sa Barangay Sirao ug didto nahitabo ang paglugos.
Misuway pa unta sa paglugnot ang biktima apan gihulagway niini nga kusgan ug malampuson kini sa iyang gihimo sa suspek.
“Sa akong initial nga investigation ani murag nagkita ni silang duha and then didto na nahitabo ang pag-rape,” matud ni Daligdigan.
Hugot matud pa nga gihimakak sa suspek nga iyang gilugos ang biktima tungod iyang giangkon nga managhigugmaay silang duha.
Apan ang biktima, matud ni Daligdig, nagsigi og hilak ug nangurog atol sa gihimong imbestigasyon.
Gidala sa kapulisan ang biktima sa pink room sa Vicente Sotto Memorial Medical Center, Huwebes, Hulyo 16 alang sa pagpaubos sa medical examination.
Pursigido ang biktima nga mopasaka og kasong pagpanglugos batok sa suspek. (Superbalita Cebu)