NIKLARO si Lapu-Lapu City Mayor Junard “Ahong” Chan nga wa siya mosupak sa programa sa gobyerno nga Public Utility Vehicle (PUV) Modernization Program.
Apan gusto lang niya nga di makulban og kaldero ang mga driver sa traysikol ug multicab sa dakbayan.
Sa Huwebes, Hulyo 18, dihang nakigtagbo si Presidential Assistant to the Visayas Secretary Michael Dino kang Chan aron mangayo og katin-awan sa nanggawas nga balita kabahin sa e-jeeps sa isla sa Mactan.
“Ato lang giklaro nga kita dili ta supak sa modernization sa atong transportation. Sayop na ang naa sa balita karon. Kita paborable gyud ta sa modernization. Ang atoa lang gusto nato ma-review ang rota nato sa e-jeep,” si Chan atol sa meeting niini tali kang Dino.
Sa interview niya sa reporters niadtong Miyerkules, Hulyo 17, mao kini ang giingon ni Chan: “I will oppose sa additional 75. In fact these 25 I am opposing, these 25, because it’s affected the livelihood of the multicab drivers and the tricycle drivers.”
Human siya nakadawat og daghang batikos sa iyang baruganan, miingon na si Chan nga gusto lang niya nga sublion ug rebisaron ang Local Public Transport Route Plan (LPTRP) tungod kay di siya gusto nga mawagtangan og panginabuhi ang kaniadto pang mga drayber sa dakbayan.
“Dili sad ko mosugot nga maligsan sila kay maapektohan man sad gyud ang atoang syudad,” dugang ni Chan niadtong Huwebes, Hulyo 18.
Karon 25 ka mga e-jeepneys ang gipadagan na sa isla sa Mactan diin magdagan sa upat ka mga rota paingon sa lungsod sa Cordova. Laing 75 ka e-jeep ang padaganon sa dakbayan sa di pa ang Hunyo 2020.
Dihang gibalita ang pamahayag ni Chan, daling nangayo og tabang si Land Transportation Franchising and Regulatory Board (LTFRB) 7 Regional Director Col. Eduardo Montealto Jr., kang Dino aron masulbad ang problema.
“I know that Mayor Chan is a very reasonable man and how he has been very supportive of President Duterte’s programs,” matod ni Dino.
Lakip nga nakigtagbo kang Dino, Chan, ug Montealto, mao sila si Land Transportation Office (LTO) 7 Regional Director Victor Caindec ug Department of Tourism (DOT) 7 Regional Director Shahlimar Hofer Tamano.
Gibutyag usab ni Montealto nga aduna’y “Tsuper Iskolar” nga programa ang Department of Transportation ug ang Technical Education and Skills Development Authority (Tesda) nga scholarship program aron mapun-an pa ang kahanas sa mga drayber ug mapun-an kini og dugang panginabuhian gawas sa pag-drive.
Maghuwat usab ang LTFRB 7 sa revision sa route plan sa dakbayan diin konsultahon usab ni Chan ang mga driver niini.
Colorum
Moabot sa 37 ka mga colorum nga mga tricycle sa Lapu-Lapu ang nadakpan sa subsob karon nga paggukod sa kapulisan niining maong mga unit.
Ang paggukod sa mga colorum nga tricyle gimando ni Chan sa kapulisan gumikan kay alang kaniya mao kini ang usa sa nakatampo sa kahuot sa dagan sa trapiko sa dakbayan.
Base sa monitoring ni Chan, moabot sa 1,000 ka mga tricycle sa dakbayan ang colorum kun way prangkisa hinungdan nga angayan kining makuhaan.
Ang City Hall wa na moisyu ug bag-ong prangkisa sa mga tricycle sa pagkakaron sanglit 4,000 na ka mga tricycle ang nagdagan sa dakbayan.
Atol sa operasyon sa Traffic Enforcement Unit sa Lapu-Lapu City Police Office, City Traffic Management System CTMS ug Special Weapons and Tactics (Swat) sa Barangay Pajac sa Huwebes, Hulyo 18, niuban si Chan sa mga awtoridad aron sa pagsikop sa mga colorum nga mga tricycle. (HBL, GCM)