BISAN ning pipila na lang ka gutling sa mga adlaw nga nahabilin sa dili pa ang ilang away, way paglubad ang pagsigi og palagot ni undefeated Keith Thurman ngadto ni eight-division world champion Manny Pacquiao.
Sa iyang pag-abot niadtong Martes sa Las Vegas, gipakita ni Thurman ngadto sa mga media ang dakong pagsalig nga modaog ug iyang paretiruhon ang Filipino boxing icon sulod sa sayong mga rounds.
Hinuon kon record ang atong basehan aduna gyuy kapabilidad si Thurman nga matuman ang iyang gipanghambog kay tiaw mo bay way pildi sa 29 ka daog, unya 22 niini ang iyang gipang-knockout.
“This is Keith ‘One Time’ Thurman. I’m the real deal,” palanog ni Thurman nga nag-atubang sa emcee kinsa maoy mi-introduce kanila ngadto sa mga media sa MGM Grand. “Manny Pacquiao—he’s gonna feel it. I’m not Adrien Broner. I’m not Lucas Matthysse. I’m undefeated for a reason.”
Atong gisuhid ang video footage sa katapusang away ni Thurman, 30, batok ni Joselito Lopez niadtong bulan sa Enero ning tuiga didto sa Barclays Center sa Brooklyn.
Entertaining ug dili boring ang maong away kay sakto man gyud sa sinukliay sa kumo ang imong masaksihan.
Si Lopez, 34, mas beterano pa ni Thurman sa pamoksing kay aduna na man kini 36 ka daog, 19 ka knockout ug pito ang pildi. Mas taas siya og duha ka pulgadas batok ni Thurman.
Agresibo kaayo kini nga moaway kay perming moataki nga gani pipila ka higayon mawingig si Thurman, pero gilupig siya sa puntosanay.
Dihay usa ka round nga maayong pagkaantimano ang apapangig ni Lopez ug natumba kini. Kadto maoy turning point sa iyang kadaugan ni Thurman.
Pero sa akong hamubong panglantaw, haom ang estelo ni Thurman ngadto ni Pacquiao. May pagkatara.
Pipila ka higayon nga perming masabak ang iyang nawong sa kumo ni Lopez ug dihay mga round nga permi siyang mapasandig sa pisi.
Ambot og bunga lang ba kaha kadto sa dugay-dugay nga panahon nga wa siya makaaway.
Si Thurman wa makasaka sa ring og dul-an sa duha ka tuig tungod sa injury, ug ang iyang pagpakigsangka ni Lopez matawag lang nga tuneup fight mahimong pagpawala lang sa mga taya.
Pero kining iyang sigi og panghambog nga paundangon si Pacquiao sulod sa sayong rounds, makapahinumdom ni sa giingon usab sa kampo ni Miguel Cotto nga kutob ra sa walo ka round si Pacquiao.
Ang nahitabo, siya hinuon ang gi-knockout sa ika-12 ka hugna.
Nagduda ko nga gikuyawan si Thurman ning awaya ug mao ni rason nga nagsigi na lang siya og palagot ni Pacquiao aron maguba ang konsentrasyon sa Pambansang Kamao.
Pero igmat si Pacquiao ning maong estratihiya. Dili ni bag-o alang kaniya.
Nahinumdom mo ni Ricky Hatton nga gipatikangkang ni Pacquio sulod lang sa duha ka round.
Sa wala pa ang away grabi nakabukal ang baba ni Hatton. Nagsigi lang og pamiaybiay nga mao hinuoy nakapadasig sa fighting senator.
Kahibawo mo og diin to awaya? Sa MGM Grand Garden Arena gihapon.
Daghang nagpangutana og unsay panahom nato ning awaya ug sa akong pinobre nga pangagpas - Pacquiao by knockout, in 10 rounds or less. (jun.migallen22@yahoo.com)